Mjekja infeksioniste Silvia Bino, e ftuar në emisionin “Kjo Javë” në News24, theksoi se ne po kalojmë në sezonin e gripit, ku intensiteti i infeksioneve është i lartë.
Ajo informoi se shifrat e infeksioneve janë në nivele të ngjashme me ato të dy viteve të mëparshme, duke sugjeruar se gripi po paraqitet siç pritej.
Bino theksoi rëndësinë e vaksinimit kundër gripit, duke e rekomanduar për çdo person mbi 6 muaj. Sipas saj, vaksinimi është veçanërisht i domosdoshëm për individët mbi 60 vjeç, të cilët janë në rrezik më të madh për të zhvilluar forma të rënda të gripit dhe për të përjetuar komplikacione.
“Një person i vaksinuar ka më pak mundësi të preket nga gripi dhe, nëse e kap, është më pak i rrezikuar nga komplikacionet,” shpjegoi Bino. Ajo inkurajoi të gjithë qytetarët, veçanërisht ata në grupe të rrezikuara, të konsultohen me mjekët e tyre dhe të marrin vaksinën për të mbrojtur shëndetin e tyre gjatë këtij sezoni gripal.