Rektori i Universitetit të Tetovës, Prof. Dr. Jusuf Zejneli bashkë me ekipin e tij, e priti në takim Ambasadoren e Republikës së Greqisë në Maqedoninë e Veriut, Shkëlqesinë e Saj z. Sofia Filipidou, të shoqëruar nga zëvendësambasadorja Kristina Vasilatou si dhe gjykatësi Sotirios Tsouvalas.
Në këtë takim, siç kumtoi Zyra për informim pranë UT-së, u diskutua për bashkëpunimin akademik ndërmjet Universitetit të Tetovës dhe universiteteve dhe instituteve kërkimore nga vendi dhe rajoni, si dhe për misionin dhe vizionin e Universitetit të Tetovës dhe rolin që ky institucion luan në zhvillimin arsimor dhe shkencor në vendin tonë dhe më gjerë.
U bisedua edhe mbi rëndësinë e ndërtimit të marrëdhënieve të qëndrueshme me qëllim realizimin e projekteve të përbashkëta shkencore, shkëmbimin e studentëve dhe stafit akademik, si dhe organizimin e konferencave dhe aktiviteteve të përbashkëta kulturore dhe arsimore.
Shkëlqesia e Saj, z. Sofia Filipidou, shprehu gatishmërinë që të mbështesë çdo iniciativë e cila synon forcimin e bashkëpunimit ndërmjet institucioneve arsimore të dy vendeve. Ajo e vlerësoi përkushtimin e Universitetit të Tetovës ndaj zhvillimit të arsimit të lartë dhe krijimit të hapësirave për dialog dhe bashkëpunim ndërkombëtar.
Pas këtij takimi, në Klinikën Juridike të Fakultetit Juridik u mbajt një ligjëratë profesionale nga gjykatësi Sotirios Tsouvalas me temë e “E drejta civile greke”.