Kina dhe Rusia u zotuan për një përgjigje të përbashkët ndaj sanksioneve të njëanshme gjatë një vizite të kryeministrit të Rusisë, Mikhail Mishustin – ndërsa presidenti kinez, Xi Jinping rikonfirmoi angazhimin e Pekinit për të avancuar lidhjet me Moskën pavarësisht kushteve të jashtme “të trazuara”, sipas “Reuters”.
“Të dyja palët do të bëjnë çdo përpjekje të nevojshme për të ofruar ndihmë dhe bashkëpunim të ndërsjellë në kundërshtimin e masave shtrënguese të njëanshme”, thanë Pekini dhe Moska në një deklaratë të përbashkët – të lëshuar nga Ministria e Jashtme e Kinës pas një takimi midis kryeministrit Li Qiang dhe homologut të tij rus, Mishustin një ditë më parë.
“Çdo masë shtrënguese e njëanshme e ndërmarrë nga çdo vend ose grup vendesh që anashkalojnë rezolutat e Këshillit të Sigurimit të OKB-së është e paligjshme”, tha ministria, duke shtuar se masa të tilla nuk mund të pranohen ose njihen.
Kina dhe Rusia janë të dyja anëtare të përhershme të Këshillit të Sigurimit të OKB-së, me të drejtë vetoje për rezolutat e tij.
Deklarata erdhi mes përpjekjeve të ripërtërira të presidentit të SHBA-së, Donald Trump, për t’i dhënë fund luftës së Rusisë kundër Ukrainës duke ushtruar presion mbi Moskën – dhe ata që bëjnë biznes me Moskën – me sanksione dhe tarifa dytësore.
Pekini gjithashtu është përpjekur vazhdimisht të konsolidojë lidhjet me fqinjin e saj verior, pavarësisht një armëpushimi tregtar të rënë dakord së fundmi me Shtetet e Bashkuara të Amerikës.
Presidenti kinez, Xi u takua sot në Pekin me kryeministrin rus Mikhail Mishustin, duke bërë thirrje për zgjerimin e investimeve të ndërsjella, një ditë pasi kryeministri Li Qiang zhvilloi një takim me Mishustin në Hangzhou, ku Li kërkoi forcimin e bashkëpunimit me Rusinë dhe mbrojtjen e interesave të përbashkëta të sigurisë.
Kremlini ka theksuar rëndësinë e vizitës së Mishustin në një kohë kur Rusia po i nënshtrohet sanksioneve të mëdha perëndimore për shkak të luftës së saj në Ukrainë.
“Marrëdhëniet Kinë-Rusi kanë qëndruar në kursin drejt zhvillimit të një niveli më të lartë dhe me cilësi më të lartë, duke përparuar vazhdimisht pavarësisht një mjedisi të jashtëm të trazuar”, tha Mishustin.