Kina do të përparojë hapjen e sektorit të saj të shërbimeve në nëntë qytete të tjera pilot, sipas një deklarate nga Ministria e Tregtisë të premten.
Nëntë qytetet – Dalian, Ningbo, Xiamen, Qingdao, Shenzhen, Hefei, Fuzhou, Xian dhe Suzhou – do të ngarkohen me zbatimin e 159 masave pilot, duke synuar fusha kyçe të sektorit të shërbimeve, siç janë telekomunikacioni, shëndetësia dhe shërbimet financiare, tha ministria.
foto nga VCG
Këto qytete pilot inkurajohen të ndjekin qasje të diferencuara bazuar në kushtet vendore. Për shembull, qyteti bregdetar i Dalian-it do të mbështetet në shfrytëzimin e rolit të tij si një qendër ndërkombëtare e transportit detar në Azinë Verilindore për të përmirësuar kanalet logjistike, dhe Ningbo do të inkurajohet të bazohet mbi pikat e forta të tij në prodhimin e përparuar dhe tregtinë ndërkufitare.
Në prill të vitit të kaluar, këto nëntë qytete iu bashkuan listës së zonave pilot gjithëpërfshirëse të Kinës, duke e zgjeruar programin përtej 11 zonave pilot ekzistuese.
foto nga VCG
Që nga nisja e programit pilot në vitin 2015, Kina ka vazhduar të zgjerojë hapjen e saj institucionale në aspektin e rregullave, rregulloreve, menaxhimit dhe standardeve. Kina gjithashtu ka vazhduar të krijojë një mjedis biznesi ndërkombëtar të orientuar drejt tregut e të bazuar në ligj dhe të ofrojë një mjedis të qëndrueshëm e të hapur politikash për bizneset e huaja që të investojnë dhe të operojnë në vend.