Kuvendi miratoi sot 4 rezoluta për veprimtarinë për vitin 2024 të 4 institucioneve të pavarura pa diskutime pasi kreu i grupit parlamentar të Partisë Socialiste, Taulant Balla kërkoi kalim të menjëhershëm në votim pas debateve në seancë.
“Fjala për procedurë merret vetëm një herë. Kam parë këtu kanë ndodhur shumë gjëra sot, Keni përjashtuar nga e drejta e fjalës një deputet. Për procedurë, konstatoj se pjesa tjetër e sallës nuk do që të hyjmë në rendin e ditës, e për pasojë propozoj kalimin në votim. Ju lutem, hidheni në votim propozimin tim për 4 pikët e rendit të ditës. Janë 4 rezoluta, ndërkohë shqyrtimi i mocioneve me debat të kalojë në seancën pasardhëse”, tha Balla.
Pas hedhjes në votim, deputetët e mazhorancës votuan pro kalimit në votim pa diskutime.
Kështu, Kuvendi miratoi me 76 vota pro dhe 2 kundër rezolutën për veprimtarinë e Autoritetit të Komunikimeve Elektronike dhe Postare (AKEP) për vitin 2024.
Kuvendi miratoi me 76 vota pro rezolutën për veprimtarinë e Komisionerit për të Drejtën e Informimit dhe Mbrojtjen e të Dhënave Personale (KDIMDP) për vitin 2024
Gjithashtu, Kuvendi miratoi me 76 vota pro rezolutën për veprimtarinë e Entit Rregullator të Energjisë (ERE) për vitin 2024.
Kuvendi miratoi me 76 vota pro edhe rezolutën për veprimtarinë e Entit Rregullator të Ujit (ERRU) për vitin 2024.