Me krenari për një emër të madh – Muharrem Gjocaj nga Peja! Një legjendë e boksit shqiptar që ka lënë gjurmë të pashlyeshme në historinë e sportit tonë!
Karriera e tij nisi që në moshën 17-vjeçare në klubin e boksit “Peja”, nën drejtimin e dy figurave të njohura të sportit të asaj kohe – Fuat Muhaxheri dhe Haki Kastrati. Klubi garonte në Ligën e Dytë të Jugosllavisë, dhe Muharremi, me guximin dhe vendosmërinë e një luftëtari të lindur, arriti të mposht shumë kundërshtarë të fortë në kategorinë e tij.
Talenti i tij nuk kaloi pa u vërejtur. Në një moment kyç për karrierën e tij, Lah Nimani – bashkë me ndihmësin Sefedin Braha – e tërhoqën Muharremin drejt klubit të boksit “Prishtina”, i cili bënte pjesë në Ligën e Parë Federative të Jugosllavisë. Kjo ishte një ngritje e madhe, dhe Gjocaj e shfrytëzoi në maksimum: aty u përball me kolosë të vërtetë dhe shkëlqeu në çdo përballje.
Ai shënoi fitore ndaj emrave të mëdhenj si Budimir Raziq, Andriq, Drashkoviq, Zoran Millatoviq, Ratko Rudoniq ,dhe të tjerë – duke përfaqësuar me dinjitet jo vetëm klubin, por gjithë shqiptarët në një arenë sfiduese.
Më vonë, karrierën e tij e vazhdoi me sukses edhe në Zvicër, ku përsëri nuk reshti së ngrituri flamurin shqiptar nëpër ringje ndërkombëtare. Me përkushtim, profesionalizëm dhe zemër të madhe, ai u bë shembull për brezat që vijnë.
Muharrem Gjocaj nuk është thjesht një boksier. Ai është një ikonë, një kampion, një frymëzim për rininë, dhe mbi të gjitha – një krenari kombëtare.
Legjenda e boksit shqiptar!
Simbol i viteve të arta – vitet ’80!
