Dëshironi të freskoni pamjen dhe të “fshini” disa vite nga fytyra? Këto tri nuanca flokësh, të cilat i rekomandojnë shpesh floktarët e famshëm, sjellin shkëlqim, ngrohtësi dhe një pamje më rinore, me vetëm disa tërheqje furçe
Thonë se flokët nuk janë thjesht një zbukurim, por një kornizë magjike e fytyrës që tregon me delikatesë historinë tuaj, stilin, karakterin dhe emocionet. Por, a mund të fshijë vërtet një ngjyrë flokësh gjurmët e viteve? Floktarët e yjeve pohojnë se po dhe kjo arrihet pa ndryshime drastike që shpesh trembin ato që duan të ruajnë natyrshmërinë.
Sekreti qëndron tek tonet e ngrohta dhe natyrale, si drita e artë e diellit që përkëdhel fytyrën në perëndim, duke zbutur linjat e forta dhe duke i dhënë fytyrës butësi. Këto nuanca sjellin freski dhe një sharmë të lehtë rinor, ashtu si një puhizë pranvere.
Më poshtë zbulojmë tri ngjyra që stilistët i konsiderojnë të domosdoshme për të rikthyer shkëlqimin dhe gjallërinë në çdo fije floku, transmeton Telegrafi.
1. Balayage në ngjyrë gjalpi
Balayage në nuancë gjalpi si manikyr i verdhë krem, nuk është thjesht një trend, por një art i finesës. Kjo teknikë kombinon një ton të ngrohtë, të artë dhe qumështor, me kalime natyrale ngjyrash, duke krijuar një pamje që është jo vetëm e bukur, por edhe jashtëzakonisht elegante.
Tonet e ngrohta si gjalpi pasqyrojnë dritën në mënyrë perfekte, duke e bërë lëkurën të duket më e ndritshme dhe fytyrën më të pushuar. Ekspertët theksojnë se pjesët e ndriçuara lehtë e zbusin dhe e bëjnë fytyrën më harmonike. Kjo teknikë është veçanërisht efektive për gratë me flokë të hollë ose të pashkëlqim, sepse shton volum dhe dimension.
Një tjetër plus? Nuk kërkon mirëmbajtje të shpeshtë. Me kalimin e kohës, rrënjët rriten natyrshëm pa krijuar kontraste të forta. Është zgjedhja ideale për këdo që kërkon një pamje të freskët, rinore dhe pa shumë mundim.
2. Fije të ngrohta në ngjyrë mjalti
Nëse doni të dukeni sikur sapo jeni kthyer nga pushimet, prarimet në nuanca mjalti janë zgjedhja perfekte. Kjo ngjyrë ndërthur tonet e arta dhe karamelit, duke i dhënë fytyrës ngrohtësi dhe shkëlqim natyral. Prerjet në nuancat e mjaltit funksionojnë si një “filter” natyral që thekson pamjen rinore, duke zbutur linjat e fytyrës.
Këto fije të ngrohta në ngjyrë mjalti janë ideale për flokët me ngjyrë të çelur ose mesatare, sepse japin një kontrast delikat që freskon pamjen pa e bërë dramatike. Për flokët më të errët, ato krijojnë thellësi dhe ndriçim, duke nxjerrë në pah fytyrën.
Sipas ekspertëve, suksesi është tek aplikimi i kujdesshëm, prarimet duhet të shpërndahen strategjikisht, sidomos rreth fytyrës, për të nxjerrë në pah konturet dhe për të dhënë iluzionin e një lëkure më të tendosur.
3. ‘Blended Blonde’
Harroni platinën klasike, blended blonde është një version më i sofistikuar që bashkon tone të ndryshme, nga bezhat e ngrohta te kalimet e arta delikate. Nuk është thjesht një ngjyrë, por një “koktej” kremoz që i jep flokut dimension dhe butësi.
Kjo nuancë balancohet mes tonëve të çelur dhe atyre pak më të errët, duke krijuar një pamje të freskët dhe natyrale. Është perfekte për ato që duan të zbusin linjat e fytyrës, sepse funksionon si një burim natyral drite. Për më tepër, kjo zgjedhje është praktike për këdo që nuk dëshiron të vizitojë shpesh parukierin, kalimet janë aq natyrale, sa rrënjët që rriten nuk krijojnë linja të dukshme.
Një nga avantazhet kryesore të kësaj ngjyre është universaliteti i saj. I përshtatet çdo nuance të lëkurës, duke shtuar ngrohtësi ose neutralitet aty ku duhet. Prandaj nuk është çudi që blended blonde shihet si një “eliksir rinie” nga stilistët më të famshëm.