Studiuesit në Qendrën RIKEN për Shkencën e Burimeve të Qëndrueshme (CSRS) në Japoni janë në prag të komercializimit të një zbulimi që mund të nxisë prodhimin e hidrogjenit të lirë si një alternativë ndaj benzinës dhe naftës.
Duket se sekreti mund të qëndrojë në përzierjen e manganit me iridiumin shumë më të rrallë, i cili përdoret zakonisht sot në prodhimin e hidrogjenit. Mangani është shumë më i lirë.
Aktualisht, prodhimi i hidrogjenit kërkon një katalizator për të thyer molekulat e ujit dhe për të çliruar hidrogjenin. Më i miri nga këta katalizatorë të zbuluar deri më tani ishte iridiumi.
Megjithatë, ky metal është shumë i vështirë për t’u gjetur, gjë që e bën atë të shtrenjtë për përdorim masiv.
Shkencëtarët kanë zbuluar se mangani mund të jetë një zëvendësues më se adekuat, duke mundësuar një reduktim deri në 95 për qind të përmbajtjes së kërkuar të iridiumit.
Me katalizatorin e ri, prodhimi i hidrogjenit ishte i mundur vazhdimisht për më shumë se 3000 orë (rreth katër muaj) me efikasitet 82 për qind, pa degradim.
Një ekip shkencëtarësh tashmë ka filluar të punojë me partnerë industrialë të cilët kanë përmirësuar katalizatorin origjinal iridium-mangan. Së bashku, ata synojnë të vazhdojnë studimin e ndërveprimit kimik midis iridiumit dhe oksidit të manganit në mënyrë që të zvogëlojnë më tej sasinë e kërkuar të iridiumit.