Si ta mbushni enëlarësen pa sakrifikuar pastërtinë
Kur bëhet fjalë për pastrimin e enëve me enëlarëse, jo gjithmonë arrijmë t’i sistemojmë të gjitha, nga pjatat e deri te tiganët apo gotat delikate. Por, me një organizim të mirë, jo vetëm që do t’i fusni më shumë enë brenda, por edhe do të siguroheni që secila të dalë e pastër kristal.
Ekspertja e pastrimit, Diane Regalbuto, themeluese e “Betty Likes To Clean”, ndan për portalin Well + Good disa rregulla të thjeshta, por të efektshme për organizimin efikas të enëve në makinë.
1. Pjatat, vendi i duhur për pastërti maksimale
Shmangni vendosjen e të gjitha pjatave në të njëjtën anë apo drejtim. Sipas Regalbuto, ato duhet të pozicionohen në pjesën e poshtme të enëlarëses, në qendër, aty ku ndodhet spërkatësi më i fuqishëm. Vendosini duke i kthyer paksa ballë për ballë, disa majtas, disa djathtas, për një pastrim më efikas dhe të barabartë.
2. Shtesat e ngrënies, renditja që bën diferencën
Lugët, pirunët dhe thikat? Rregulli i artë është që dorezat të jenë të kthyera lart. Kështu, pjesa që vjen në kontakt me ushqimin pastrohet më mirë dhe nuk mbetet ujë në dorezë pas larjes.
3. Çinitë, si pjatat, por me kujdes shtesë
Vendosini në pjesën e poshtme, pranë pjatave. Për shkak të formës dhe sipërfaqes së gjerë, çinitë përfitojnë nga spërkatja e fortë në atë zonë. Sigurohuni që të mos mbivendosen për të shmangur njollat apo mbetjet, transmeton Telegrafi.
4. Tenxheret dhe tiganët që kërkojnë hapësirë
Vendosini gjithashtu poshtë, por gjithnjë në fund të renditjes. Ato duhet të jenë të kthyer me pjesën e hapur nga poshtë dhe anash, për të mos penguar qarkullimin e ujit dhe për të mos bllokuar rrotullimin e spërkatësit.
5. Gotat dhe filxhanët, në krye të punës
Këto duhet të vendosen gjithmonë në pjesën e sipërme të enëlarëses. Sigurohuni që të jenë të kthyera me fundin lart (pra fytyra nga poshtë), që uji dhe detergjenti të pastrojnë si brenda ashtu edhe jashtë.
Këshillë shtesë: Mos e mbingarkoni makinën! Edhe pse qëllimi është të fusni sa më shumë, çdo enë ka nevojë për hapësirë që uji të qarkullojë lirshëm. Mbipopullimi vetëm sa do të ulë efikasitetin dhe mund të lini enë të papastra në fund të ciklit.
Nëse i zbatoni këto këshilla, jo vetëm që do të kurseni kohë dhe energji, por do të keni gjithmonë një enëlarëse të ngarkuar në mënyrën më të mençur dhe enë të pastra pa njolla!