Kryetarja e Kuvendit, Elisa Spiropali deklaroi sot se, anëtarësimi i Shqipërisë në familjen evropiane është sot kryefjala e punës së Kuvendit.
Në fjalën e saj në Tryezën e prezantimit të Platformës së Konsultimit, Spiropali u shpreh se, transparenca është një ndër vlerat dhe standardet kryesore të Kuvendit, e përcaktuar si e tillë edhe në Planin e ri Strategjik, 2025-2030, i cili u paraprin dhe kalendarizon nevojat e brendshme të konsolidimit të Kuvendit të Shqipërisë si zemra e demokracisë dhe e republikës parlamentare, domosdoshmërinë që shtrojnë para Kuvendit zhvillimet në shoqërinë shqiptare dhe, ajo që është më kryesorja, kërkesat dhe standardet e procesit të anëtarësimit në Bashkimin Evropian”.
“Anëtarësimi i Shqipërisë në familjen evropiane është sot kryefjala e punës e Kuvendit dhe e çdo institucioni, sepse është dëshira e qytetarëve të Shqipërisë, por është kryefjala edhe e veprimtarisë së shoqërisë civile dhe partnerëve të Kuvendit”, tha Spiropali.
Kryeparlamentarja vlerësoi ndërgjegjësimin dhe përkushtimin e shërbimeve parlamentare për të avancuar me përgatitjen e platformave, mekanizmave, standardeve dhe procedurave të modernizimit të Kuvendit, si pjesë e procesit transformues drejt integrimit evropian dhe njësimit apo përfarimit të tyre me ato të parlamenteve të vendeve anëtare si edhe të Parlamentit Evropian.
“Nuk e fsheh kënaqësinë që ndjeva kur në mbledhjen e kryeparlamentarëve të vendeve anëtare të Këshillit të Evropës, zhvilluar para pak ditësh në Strasburg, ishim në koherencë të plotë me Parlamentin Evropian, kur zëvendëspresidenti i tij përmendi funksionimin e Komisionin kundër Dezinformimit në Parlamentin Evropian, ndërsa unë ngritjen e Komisionit të Posaçëm kundër Dezinformimit dhe Komisionit të Posaçëm Antikorrupsion në Kuvendin e Shqipërisë, si masa për mbrojtjen e vlerave, institucioneve dhe shoqërive demokratike”, tha Spiropali.
“E përmenda këtë, për të vënë në dukje sa thelbësor është njësimi i strukturave e procedurave të Kuvendit me ato të Parlamentit Evropian dhe të vendeve anëtare. Prandaj çdo ndryshim, rishikim apo përmirësim i veprimtarisë sonë duhet të udhëhiqet nga ky vizion”, theksoi Spiropali.
Kryetarja e Kuvendit nënvizoi se, promovimi i pjesëmarrjes së shoqërisë civile dhe publikut në proceset parlamentare, ka qenë dhe mbetet një prioritet i Kuvendit.
Për këtë qëllim, shtoi Spiropali, “prej muajit nëntor 2020 Kuvendi kishte venë në zbatim Platformën e konsultimit publik, e cila ofron mundësinë e konsultimit on-line të projektligjeve që publikon Kuvendi”.
Por, vijoi ajo, “me rritjen e kërkesave për transparencë dhe standardet që na kërkohen drejt anëtarësimit, për ta bërë procesin e konsultimit më gjithëpërfshirës, më cilësor dhe më efektiv, vendosëm të ngremë një platformë të re konsultimi”.
“Platforma e re do të jetë më e aksesueshme dhe më e përdorshme nga partnerët e Kuvendit, duke synuar rritjen e transparencës, rritjen e numrit të pjesëmarrësve në proces, dinamizmin e procesit të konsultimit, efikasitetin operacional, lehtësimin e procedurave dhe reduktimin e burokracisë, rritjen e sigurisë dhe garantimin e konfidencialitetit të të dhënave, krijimin e kushteve për analiza më të thelluara, mundësimin e përdorimit të anketimeve, kategorizimin e përdoruesve sipas tipologjive, lehtësimin e komunikimit institucional, përdorimin më efektiv të rrjeteve sociale, inkorporimin më eficient të rezultateve të konsultimit në procesin ligjbërës dhe veprimtaritë e Kuvendit etj.”, tha ajo.
Duke vlerësuar punën që kanë bërë shërbimet e Kuvendit, Spiropali bëri dy sugjerime, të cilat sipas saj, do ta bëjnë këtë platformë më produktive dhe të dobishme, sidomos për procesin legjislativ.
“Sugjerimi i parë lidhet me zgjerimin e spektrit të akteve ligjore që i nënshtrohen platformës së konsultimit publik, duke përfshirë në procesin e konsultimit të gjitha aktet ligjore dhe duke mos e lënë këtë praktikë në dorë të vendimmarrjes së komisioneve të përhershme, vendime që në mjaft raste marrin ngjyrim politik”, tha Spiropali.
“Sugjerimi i dytë lidhet me përshpejtimin e afateve kohore të procesit të konsultimit. Konkretisht, do të rekomandoja që aktet ligjore të hidhen në platformën e konsultimit menjëherë dhe automatikisht pas vendimmarrjes në Konferencën e Kryetarëve, pa pritur depozitimin e tyre në komisionet e përhershme”, theksoi Kryetarja e Kuvendit.
Spiropali shprehu bindjen se, “duke përfshirë në procesin e konsultimit të gjitha aktet ligjore, pa dallime e përjashtime, dhe duke e bërë këtë procedurë sa më të thjeshtë, demokratizohet më shumë procesi legjislativ dhe bëhet më rezultativ bashkëpunimi ynë me qytetarët, publikun, shoqërinë civile, grupet e interesit dhe gjithë shoqërinë.