Shkup, 1 tetor – Në vendin 91! Gostivari mes korrupsionit, mbeturinave dhe qenve endacakë
Të nderuar qytetarë, të dashur përfaqësues të mediave,
Raporti më i fundit për Indeksin e Transparencës Aktive 2025, i publikuar në shtator 2025, tregon një realitet alarmant për komunën tonë. Gostivari ka rënë me –10 pikë përqindje brenda një viti, duke u renditur vetëm në vendin e 91-të me rezultat 58.6%, nga 101 institucione shtetërore të përfshira në këtë raport.
Kjo është një nga rëniet më të mëdha në nivel republikan dhe dëshmon qartë se në Komunën e Gostivarit mungon qeverisja e hapur, përgjegjësia ndaj qytetarëve dhe vullneti për të ofruar llogaridhënie.
Ndërkohë që Bërvenica me 94.2% dhe Tetova me 81.4% tregojnë se transparenca është e realizueshme kur ka menaxhim të përgjegjshëm, Gostivari për fat të keq ndodhet pranë komunave më pak transparente në vend, përkrah Bogovinës (49.3%) dhe Vrapçishtit (43.7%).
Kjo situatë nuk është thjesht një statistikë – qytetarët e Gostivarit e përjetojnë çdo ditë. Dëshmitë që sjellim së bashku me qytetarët, të verifikuara edhe nga raporti për transparencën, tregojnë:
· Vendime të panevojshme ose të fshehura,
· Mungesë informacioni për shpenzimet e buxhetit,
· Mungesë kontrolli mbi menaxhimin e resurseve publike.
Plotësim i këtij raporti për mos-transparencë është edhe informacioni zyrtar nga Komisioni Shtetëror për Parandalimin e Korrupsionit: Kryetari aktual i komunës nuk ka dorëzuar deklaratën për gjendjen financiare – Listën Anketuese, një obligim ligjor për çdo bartës të funksioneve publike.
Parashtrrojm publikisht pyetjen: Pse kryetari në detyrë nuk e ka dorëzuar deklaratën, ashtu siç e kërkon ligji?
Misioni ynë për Gostivarin
Si kandidat i pavarur për kryetar komune, unë dhe ekipi im kemi një mision të qartë: t’i japim fund këtij cikli dhe ta kthejmë Gostivarin në një model transparence dhe pastërtie.
Gostivari duhet të pastrohet:
· Nga korrupsioni – për një komunë të ndershme, me llogaridhënie të plotë.
· Nga mbeturinat – për një qytet të pastër, të shëndetshëm dhe të denjë për qytetarët.
· Nga qentë endacakë – për një mjedis të sigurt, pa rrezik për fëmijët dhe qytetarët.
Transparenca dhe pastërtia janë themeli i besimit mes qytetarëve dhe pushtetit lokal. Pa to, nuk mund të ketë zhvillim, progres apo mirëqenie.
Më 19 tetor, qytetarët e Gostivarit do të kenë mundësinë të zgjedhin një rrugë tjetër: Një komunë të hapur dhe të ndershme, Një pushtet që i shërben qytetarëve, jo interesave të ngushta, Një Gostivar të pastruar nga korrupsioni, mbeturinat dhe qentë endacakë.
Ky është angazhimi im si kandidat i pavarur për kryetar komune: ta kthejmë Gostivarin në një model të transparencës, pastërtisë dhe llogaridhënies publike, duke u bazuar në dëshmitë e qytetarëve dhe raportet zyrtare të transparencës.
Visar Ademi, kandidat i pavarur për kryetar të Komunës Gostivar