Shkup, 26 korrik – Në margjinat e takimit të Platformës së paqes në Ballkan, ministri i Punëve të Jashtme dhe Tregtisë së Jashtme, Timço Mucunski sot në Stamboll u takua me homologun e tij turk, ministrin e Punëve të Jashtme, Hakan Fidan.
Në takim është biseduar për avancimin e marrëdhënieve politike bilaterale, forcimin e bashkëpunimit ekonomik dhe shfrytëzimin e mundësive për investime.
Bashkëbiseduesit u ndalën edhe në thellimin e bashkëpunimit në fusha të tjera me interes të ndërsjellë.
Dy ministrat konfirmuan miqësinë e fortë midis dy vendeve, bashkëpunimin e ngushtë brenda NATO-s, si dhe mbështetjen e ndërsjellë në organizatat multilaterale.
Bisedat përfshinë edhe çështjet aktuale rajonale dhe gjeopolitike, me theks në rëndësinë e një Ballkani të qëndrueshëm dhe prosperues.
Takimi u zhvillua në kuadër të takimit të parë të Platformës për paqe në Ballkan të iniciuar nga ministri i Punëve të Jashtme të Republikës së Turqisë, Hakan Fidan.