Shkup, 17 shtator – Çështja e mundësisë së një bashkëpunimi mes Bashkimit Demokratik për Integrim (BDI) dhe partisë “E Majta” (Levica) është shndërruar në një temë të nxehtë të diskursit politik në Maqedoninë e Veriut, sidomos në prag të zgjedhjeve lokale. Akuzat dhe kundërakuzat që po qarkullojnë mes kryeministrit dhe liderit të VMRO-DPMNE-së, Hristijan Mickoski dhe përfaqësuesve të BDI-së zbulojnë më shumë për luftën politike sesa për një realitet të bashkëpunimit. Megjithatë, pavarësisht nëse Levica po e ndihmon realisht apo jo BDI-në, efekti politik i akuzave është i qartë ato e vendosin BDI-në në qendër të vëmendjes dhe e rrisin si subjekt që nuk mund të anashkalohet në skenën politike të Maqedonisë së Veriut, shkruan Zhurnal.
Mickoski ngren dilemat e bashkëpunimit BDI-Levica –
Kryeministri i vendit, Hristijan Mickoski, ka deklaruar se Levica duke kandiduar në komuna si Tetova, Gostivari dhe Struga, po ndihmon në mënyrë indirekte BDI-në, duke fragmentuar votën anti-BDI. Për të, kjo është një strategji e përbashkët e këtyre dy partive për të shpëtuar pozitat e BDI-së në bastionet shqiptare. Nga ana tjetër, BDI përmes nënkryetarit, Arbër Ademi, ka mohuar kategorikisht çdo lloj marrëveshjeje, duke e kthyer vëmendjen te fakti se është vetë VMRO ajo që ka zgjedhur të mos garojë me kandidatë në disa prej këtyre komunave.
Në thelb, akuzat e Mickoskit mbështeten mbi logjikën elektorale të shpërndarjes së votës. Nëse elektorati anti-BDI ndahet mes disa opsioneve, përfiton partia që ka strukturën më të fortë dhe bazën më të konsoliduar në këtë rast BDI. Nga ana tjetër, mungesa e kandidatëve të VMRO-së në disa komuna mund të shihet po ashtu si një taktikë e planifikuar për të forcuar pozitat e koalicionit të saj qeveritar VLEN, ku ndikimi i Mickoskit është i dukshëm.
Pra, dilema nuk qëndron aq nëse ka një marrëveshje të fshehtë mes BDI-së dhe Levicës, por nëse vetë konfigurimi i garës elektorale krijon një situatë që përfiton një palë në kurriz të tjetrës. Politika shpesh perceptohet po aq përmes imazheve dhe akuzave sa edhe përmes fakteve të prekshme.
Akuzat e Mickoskit ndaj BDI-së vetëm se e rrisin këtë parti –
Deklaratat e Mickoskit të shoqëruara me gjuhë të fortë politike duket se prodhojnë një efekt të dyfishtë në vend që ta dobësojnë BDI-në ato shpesh e konsolidojnë atë si partinë kryesore të shqiptarëve në Maqedoninë e Veriut. Retorika e ashpër kundër BDI-së dhe lidhja e saj me Levicën krijon një perceptim të rrezikut të përbashkët, që shpesh i mobilizon simpatizantët e Ali Ahmetit.
Arbër Ademi, në reagimin e tij, e paraqet Mickoskin si autor të një skenari që synon “asimilimin politik të shqiptarëve” përmes imponimit të kandidatëve nëpërmjet VLEN-it dhe përmes mungesës së kandidatëve të drejtpërdrejtë nga VMRO. Ky lloj kundërpërgjigjeje është pjesë e një strategjie komunikimi që jo vetëm mbron BDI-në nga akuzat, por edhe e pozicionon atë si mbrojtëse e të drejtave kolektive të shqiptarëve.
Në këtë mënyrë, Mickoski, duke e akuzuar BDI-në për marrëveshje të fshehta, ndihmon pa dashje në forcimin e narrativës së kësaj partie si faktori kryesor i stabilitetit politik shqiptar. Përballë akuzave të tilla, BDI ka hapësirën e nevojshme për ta paraqitur veten si viktimë të sulmeve politike dhe në të njëjtën kohë si e vetmja parti që ruan unitetin dhe fuqinë politike të shqiptarëve.
Kujtojmë që, pavarësisht nëse Levica po e ndihmon realisht apo jo BDI-në, efekti politik i akuzave është i qartë ato e vendosin BDI-në në qendër të vëmendjes dhe e rrisin si subjekt që nuk mund të anashkalohet në skenën politike të Maqedonisë së Veriut. /Zhurnal.mk