Kryetarja e Kuvendit, Elisa Spiropali gjatë vizitës që po zhvillon në Vatikan mori pjesë edhe në shfaqjen e dokumentarit “Pritja”, nga Roland Sejko, me rastin e 10-vjetorit të vizitës së Papa Françeskut në Shqipëri.
Spiropali u takua edhe me Kardinalin Ernest Simoni, i cili sot është 96 vjeç dhe 28 vite i ka vuajtur në burgjet komuniste.
Kryeparlamentarja theksoi se, Kardinal Ernest Simonin, Papa Françesku e ka quajtur, një martir i gjallë i besimit dhe lirisë.
“Vatikan – 28 vite në burgjet komuniste. Sot 96 vjeç. Me mendje të kthjellët dhe shpirt në paqe, Kardinal Ernest Simoni është, siç e ka quajtur Papa Françesku, një martir i gjallë i besimit dhe lirisë. Në 10-vjetorin e vizitës së Papa Françeskut në Shqipëri, pamë së bashku shfaqjen e dokumentarit “Pritja”, nga Roland Sejko. Provuam emocionet e forta të asaj ngjarjeje të paharruar, përmes dëshmive të rrugës së Shqipërisë, nga errësira drejt dritës”, shkroi Spiropali në një postim në rrjetet sociale.