Nga 1 janari, individët që japin banesat e tyre me qira ditore në platforma si Airbnb dhe Booking nuk janë të detyruar të hapin NIPT. Të ardhurat që përfitojnë do të tatohen me normën 15%, të aplikuar mbi shumën bruto, dhe deklarohen përmes formularit online DIVA, brenda datës 31 mars të vitit pasardhës.
Ekspertët thonë se tatimi 15% për qiratë ditore do të llogaritet mbi të ardhurat bruto dhe ky deklarim bëhet përmes DIVA, një formular i thjeshtë online, pa detyrim për hapje NIPT.
Deklarimi është i nevojshëm edhe nëse qytetari nuk ka të ardhura të tjera. Mosdeklarimi brenda afatit sjell penalitete dhe detyrime shtesë nga Administrata Tatimore.
Vetëm në rastet kur individi ushtron edhe një aktivitet tjetër tregtar (p.sh. menaxhon prona të shumta si biznes), kërkohet hapja e NIPT-it.
Sipas ekspertëve, ky rregullim e bën më të lehtë për qytetarët të vetëdeklarojnë, duke shmangur hapjen e një biznesi formal. Megjithatë, ata theksojnë se ndihma e një specialisti mund të jetë e nevojshme për të shmangur gabime që mund të sjellin pasoja financiare.
Ky ndryshim është pjesë e përpjekjeve të administratës tatimore për të formalizuar të ardhurat nga turizmi dhe mikpritja, në një kohë kur vetëm në Booking.com numërohen mbi 20,400 njësi akomodimi në të gjithë vendin dhe më shumë se 8,200 listime në Airbnb.