Shkup, 4 nëntor – Në emisionin “Direkt”, ish-deputeti i VMRO-DPMNE-së, Marjan Gjorgiev, foli për Raportin e Komisionit Evropian për Maqedoninë e Veriut, duke theksuar se dokumenti është “i moderuar” dhe vlerëson përparimin në disa fusha kyçe – si miratimi i udhërrëfyesit për sundimin e ligjit, fillimi i reformave në administratën publike, përmirësimi i punës së institucioneve qytetare dhe formimi i këshillit për bashkëpunim mes Qeverisë dhe shoqërisë civile.
Sipas tij, zgjidhja për ecjen e Maqedonisë drejt integrimit evropian është që bullgarët të përfshihen në Kushtetutë, por me efekt të vonuar.
“Sipas mendimit tim, cili duhet të jetë hapi? Në Kuvend duhet të votohet me shumicë të madhe që bullgarët të përfshihen në Kushtetutë, por me zbatim të vonuar, dhe njëkohësisht ta përcaktojmë kushtin tonë që do ta paraqesim në Evropë,” deklaroi Gjorgiev.
Ai shtoi se shteti duhet ta bindë Bashkimin Evropian se Maqedonisë i është bërë padrejtësi, duke theksuar se “nëse Malit të Zi, me korrupsion dhe krim të lartë, iu mundësua hapja e negociatave në vitin 2012, e njëjta gjë mund të ishte bërë edhe me Maqedoninë pas vendimit të Hagës.”