Ministria e Tregtisë e Kinës njoftoi të shtunën se ka nisur një hetim antidumping lidhur me importet e disa mikroçipave qarqesh të integruara analogë me origjinë nga Shtetet e Bashkuara.
Sipas tij, hetimi antidumping u nis me kërkesë të industrisë vendase kineze në përputhje me ligjet e rregulloret kineze, si edhe me rregullat e OBT-së.
Provat paraprake të paraqitura nga aplikuesi tregojnë se, nga viti 2022 deri më 2024, importet e produkteve nga Shtetet e Bashkuara u rritën me 37 për qind, ndërsa çmimet e tyre ranë me 52 për qind, gjë që uli çmimet e brendshme të Kinës dhe dëmtoi prodhimin dhe operacionet e industrisë vendase, theksoi zëdhënësi.
Autoritetet hetimore do ta kryejnë hetimin në përputhje me procedurat statutore, do të mbrojnë plotësisht të drejtat e të gjitha palëve të interesuara dhe do të marrin një vendim objektiv e të drejtë bazuar në ato që do të zbulojë hetimi, shtoi ai.
Po të shtunën, ministria iu përgjigj një veprimi të ShBA-së për të shtuar shumë subjekte kineze në listën e kontrollit të eksportit. Një zëdhënës u shpreh se Kina e kundërshton fuqimisht këtë veprim, i cili synon subjektet kineze në sektorët e gjysmëpërçuesve, bioteknologjisë, hapësirës ajrore dhe logjistikës tregtare.
Zëdhënësi vuri në dukje që, ndërsa Kina dhe Shtetet e Bashkuara kanë planifikuar të zhvillojnë bisedime ekonomike dhe tregtare në Spanjë nga 14 shtatori, “vendimi i ShBA-së për të sanksionuar ndërmarrjet kineze ngre pikëpyetje rreth qëllimeve të saj të vërteta”.