Shkup, 1 shkurt – Mbi 385 studentë shqiptarë të Fakulteteve Juridike në vend pas nënshkrimit të peticionit që provimi i jurisprudencës të jetë edhe në gjuhën shqipe, presin përkrahje të institucioneve dhe ambasadave të huaja që të mos u mohohet e drejta kushtetuese. Sipas Mevlan Ademit, një numër i konsiderueshëm i studentëve shqiptarë nuk i nënshtrohen këtij provimi pikërisht për shkak të gjuhës.
”Ka një numër të konsiderueshëm të studentëve shqiptarë të cilët nuk i nënshtrohen këtij provimi për shkak të terminologjisë dhe gjuhës maqedonase dhe ka afër dy vite që kam nisur këtë nismë dikur si kryetar i parlamentit studentor dhe tani më zëshëm edhe me anë të një numri të madh shqiptarë që e kanë nënshkruara këtë peticion dhe mendojmë që eksitojnë të gjitha mekanizmat ligjore që kjo të bëhet por në realitet e shoh që mungon vullneti politik,” tha Mevlan Ademi – Iniciues i peticionit.
Ademi thotë se kanë marrë premtime për përpjekje për gjetjen e zgjidhjes, megjithatë një premtim të ngjashëm kishim marrë edhe para një viti e gjysmë.
“Përgjigja e fundit që morëm nga disa funksionar ku e dërguam këtë iniciativë, përgjigja është që po shqyrtohet dhe po tentojnë të gjejnë ndonjë zgjidhje për të njëjtën, por këtë përgjigje e morëm edhe para një viti e gjysmë dhe pa rezultat deri tani,” deklaroi Mevlan Ademi – Iniciues i peticionit.
Nëse 385 studentë të drejtësisë nuk marrin një përgjigje pozitive, atëherë, sipas Ademit, ata do të dërgojnë ankesa në Zyrën e OSBE-së në Shkup dhe në Këshillin e Evropës në Strasburg. Ndërkohë, 385 nënshkrimet e peticionit për mundësimin e provimit të jurisprudencës në shqip, janë dërguar në Ministrinë e Drejtësisë, Inspektoratin për Përdorimin e Gjuhëve, Agjencinë për Zbatimin e Gjuhëve, Kryetari i Kuvendit, si dhe te Zëvendëskryeministri i parë. /alsat.mk
