“Asgjë nuk mund të të bëjë më krenar sesa shërbimi me nder ndaj vendit tënd!”. Ky ishte mesazhi që oficeri ushtarak amerikan, Joseph Burns, i kishte dhënë të birit të tij, William Burns, mesazh ky që tani qëndron i gdhendur në një pllakë simbolike në objektin qendror të Agjencisë Kosovare të Inteligjencës (AKI).
Kështu është bërë e ditur në një njoftim të lëshuar nga AKI. Ceremonia e zbulimit të kësaj pllake u mbajt më 22 gusht 2024.
“Në një ceremoni të mbajtur më 22 gusht 2024, Drejtori i AKI-së, Petrit Ajeti, së bashku me Drejtorin e CIA-s, William Burns, zbuluan këtë pllakë si shenjë mirënjohjeje të përhershme ndaj Shteteve të Bashkuara të Amerikës, CIA-s dhe personalisht z. Burns”, thuhet në njoftim.
Pllaka, përveç këtij mesazhi të fuqishëm, mban edhe emblemat e dy agjencive, duke simbolizuar lidhjen e fortë mes dy institucioneve.
