Shkup, 12 janar – Aplikacioni “TVSH-ja ime” sërish nuk funksionon. Qytetarët ankohen se nuk mund të skanojnë faturat fiskale. Thonë se aplikacioni ose nuk hapet, ose marrin mesazh se nuk ka lidhje me Drejtorinë e të Ardhurave Publike.
“Në momentin po kontrolloj në telefon, nuk ka qasje në aplikacionin ‘TVSH-ja ime”, tha një qytetar.
“Tani për momentin kam problem me aplikacionin. Çfarë ju shkruan? Nuk e hap as kodin, shkoj te DAP dhe askush nuk më ndihmon”, u shpreh një tjetër qytetar.
“Ndonjëherë ka, ndonjëherë s’ka. Mungesa e lidhjes ndodh më shpesh – po”, tha një qytetar.
“Kam dëgjuar se ka ndonjë problem”, u përgjigj një qytetar tjetër.
Reagime ka edhe në rrjetet sociale. Qytetarët thonë se çdo fundjavë aplikacioni nuk funksionon. Një pjesë ankohen se sistemi nuk u lejon të skanojnë faturat, ndërsa të tjerë theksojnë se edhe pse kanë marrë njoftim se skanimi ka qenë i suksesshëm, paratë nuk u janë evidentuar.
Nga Drejtoria e të Ardhurave Publike për Alsat thonë se për shkak të azhurnimit të aplikacionit, ka vështirësi në funksionim, por nuk saktësojnë kur do të tejkalohen problemet.
“Drejtoria e të Ardhurave Publike po punon në përmirësimin e sistemit dhe për këtë arsye përdoruesit e aplikacionit ‘TVSH-ja ime’ për momentin po përballen me vështirësi teknike dhe është vështirësuar përdorimi dhe lidhja me sistemin. Presim që aplikacioni të jetë plotësisht funksional sa më shpejtë të jetë e mundur”, njoftojnë nga Drejtoria e të Ardhurave Publike.
Ndryshe, faturat fiskale mund të skanohen brenda 10 ditëve nga lëshimi i tyre, ndërsa përmes masës “TVSH-ja ime”, çdo qytetar mund të marrë deri në 2.100 denarë për tremujor apo deri në 8.400 denarë në vit.