Shkup, 13 nëntor – Pas ndryshimeve skandaloze të Kodit Penal të bërë dy vite më parë, kur shumë funksionarë shpëtuan nga ndjekja penale dhe shumica e rasteve të Prokurorisë Speciale dështuan, prej kohësh pritej miratimi i ndryshimeve ligjore në Kodin Penal. Tani, megjithatë, ka nisur numërimi mbrapsht për miratimin e Kodit të ri Penal.
Burime për “Fokus” komentojnë se tashmë nuk ka asnjë kuptim të miratohen ndryshimet e planifikuara në muajt e fundit, pasi afati për miratimin e Kodit të ri Penal përfundon deri në fund të vitit.
Nga Ministria e Drejtësisë për “Fokus” pohojnë se deri në fund të vitit, Kodi i ri do të miratohet.
“Kodi i ri Penal është përgatitur, është përkthyer në gjuhën angleze dhe aktualisht po përgatiten tabelat përkatëse. Afati për miratimin e tij, sipas Agjendës së Reformave, është dhjetori. Me Kodin e ri po bëjmë sistematizim dhe rregullim të plotë të veprave penale, përfshirë ato që lidhen me abuzimet gjatë ushtrimit të funksioneve publike. Qëllimi kryesor është krijimi i zgjidhjeve juridike më precize, më efikase dhe më të zbatueshme, në vend të veprave që ekzistojnë vetëm formalisht dhe që në praktikë është e vështirë të dëshmohen ose zbatohen në mënyrë të barabartë,” thuhet nga Ministria e Drejtësisë.
Ata shtojnë se ndjekja penale e korrupsionit do të harmonizohet me standardet evropiane.
“Ajo që është më e rëndësishme për qytetarët është se do të ekzistojnë mekanizma të qartë dhe të zbatueshëm për ndjekjen e korrupsionit, abuzimeve dhe krimit institucional – por në një formë të harmonizuar me standardet dhe rekomandimet evropiane,” theksojnë nga Ministria.
Megjithatë, duhet theksuar se ky ligj do të vlejë vetëm për veprat penale që funksionarët do të kryejnë në të ardhmen, pra nuk do të “korrigjojë” gabimet e së kaluarës dhe nuk do të anulojë amnistitë që janë dhënë.
Para disa ditësh, për nevojën e miratimit të shpejtë të Kodit Penal foli edhe kryetari i Gjykatës Kushtetuese, Darko Kostadinovski.
“Kodi Penal ka shkaktuar dëm të pariparueshëm. Në shtetin tonë sundon papërgjegjësia, ndërsa mosndëshkueshmëria që solli ky ligj vetëm sa e zgjati atë. Ne përcaktuam afat prej 6 muajsh për ndryshime, afat që skadoi në gusht. Kemi treguar mirëkuptim për procesin zgjedhor, por Kuvendi është i detyruar ta respektojë Kushtetutën dhe vendimet tona. Deri tani, nuk e ka bërë këtë,” deklaroi Kostadinovski në intervistë për “Top Tema” në Televizionin Telma.
Ai shtoi se, nëse Kuvendi nuk vepron deri në seancën e fundit të Gjykatës Kushtetuese në dhjetor, ai do ta vendosë çështjen në rend dite.
“Qëndrimi im personal është se nëse Gjykata Kushtetuese e anulon të gjithë ligjin për ndryshimet e Kodit Penal, në arsyetim do të thuhet qartë pse anulohet – sepse është miratuar në një procedurë jotransparente dhe pa debat publik. Sipas mendimit tim, në atë rast do të rikthehet në fuqi rregullorja e mëparshme ligjore. Thënë më thjeshtë, efekti anulues do të ketë karakter të ‘amnistisë ligjore kolektive’, sikur të mos kishte ndodhur kurrë. Kjo është shumë e rëndësishme, dhe është ndryshe nga rasti kur Gjykata Kushtetuese anulon vetëm disa nene – sepse atëherë efekti është ndryshe,” theksoi Kostadinovski.
Ai kujtoi se e njëjta dilemë ishte ngritur edhe me vendimin për faljet presidenciale dhe se gjykatat do të duhet të përcaktojnë si ta zbatojnë vendimin eventual të Gjykatës Kushtetuese.
“Nëse anulohet i gjithë ligji, atëherë rikthehet në fuqi zgjidhja ligjore e mëparshme. Nëse Kuvendi vendos të veprojë sipas rekomandimeve tona, nuk mund ta miratojë ligjin brenda natës, me procedurë të përshpejtuar ose me flamur evropian,” përfundoi Kostadinovski.