Të shtëna me armë në Australi, tre të vdekur dhe një i plagosur – autori i sulmit në arrati

Tre persona u vranë dhe një tjetër u plagos të enjten nga të shtënat me armë në një qytet në shtetin e New South Wales të Australisë, tha policia.

Shërbimet e emergjencës u thirrën në një adresë në liqenin Cargelligo, një qytet me rreth 1,500 banorë, pas raportimeve për të shtëna, tha një deklaratë e policisë.

Tre persona – dy gra dhe një burrë – mbetën të vdekur, dhe një burrë tjetër u dërgua në spital në gjendje të rëndë por të qëndrueshme, tha policia.

Sulmuesi apo sulmuesit raportohet se janë në arrati, transmeton Telegrafi.

Policia i bëri thirrje qytetarëve të shmangë zonën dhe banorëve vendas të qëndrojnë brenda.