Shkup, 17 mars – Zhurnal.mk – Nga sot, qytetarët do të kenë mundësinë të udhëtojnë drejtpërdrejt nga Aeroporti i Ohrit drejt Bratislava, ndërsa nga 29 marsi do të vendoset edhe linja ajrore për në Milano. Këto destinacione të reja pritet të sjellin një rritje të numrit të turistëve dhe të krijojnë mundësi të reja për zhvillimin ekonomik të rajonit të Ohrit.
Lajmin e bëri të ditur zëvendëskryeministri dhe Ministri i Transportit, Aleksandar Nikolloski, i cili theksoi se zgjerimi i rrjetit ajror është një ndër prioritetet kryesore të Qeverisë.
Sipas tij, këto linja të reja nuk vetëm që do të rrisin fluksin e turistëve në Ohër, por do të ndikojnë drejtpërdrejt në forcimin e ekonomisë lokale dhe zhvillimin e sektorit të turizmit.
“Zhvillimi i trafikut ajror është një nga prioritetet kryesore të Qeverisë dhe Ministrisë së Transportit. Përmes politikave dhe masave specifike, ne po punojmë vazhdimisht për të përmirësuar trafikun ajror civil, gjë që ka mundësuar një zgjerim të ndjeshëm të rrjetit të destinacioneve,” deklaroi Nikolloski.
Ai shtoi se institucionet mbeten të përkushtuara për të avancuar lidhjet ajrore të vendit me qendrat kryesore evropiane, duke e bërë Maqedoninë e Veriut më të aksesueshme për turistët dhe investitorët.
