Shkup, 22 korrik, Zhurnal.mk – Uji nga rrjeti i ujësjellësit në Gostivar aktualisht është i papërshtatshëm si për pije, ashtu edhe për përdorim teknik, kanë treguar analizat e Institutit të Shëndetit Publik, për çka institucionet kompetente u bëjnë apel qytetarëve të mos e përdorin deri në njoftimin e radhës.
Kjo u komunikua pas seancës së sotme të Shtabit Kryesor pranë Qendrës për Menaxhim me Kriza, të kryesuar nga ministri i Punëve të Brendshme, Pançe Toshkovski, në prani të drejtorit të QMK‑së, Muhamet Ali. Në seancë u shqyrtuan informacionet dhe analizat për gjendjen e furnizimit me ujë në Komunën e Gostivarit, pas së cilës u morën disa masa për mbrojtjen e shëndetit të qytetarëve.
Shtabi Kryesor e ka detyruar Komunën e Gostivarit që urgjentisht të propozojë lokacione dhe persona kontaktues për vendosjen e pikave të shpërndarjes së ujit teknik për objektet me rëndësi vitale. Ndërkohë, Instituti i Shëndetit Publik, NP “Ujësjellësi” – Shkup dhe Agjencia e Ushqimit dhe Veterinarisë do të vazhdojnë me testime të shtuara të cilësisë së ujit, ndërsa rezultatet do t’i dorëzojnë rregullisht te Shtabi Kryesor.
Ushtria e Maqedonisë ka vënë në gatishmëri dy cisternat për shpërndarjen e ujit teknik, të cilat do të angazhohen nëse vlerësohet se ka nevojë.
Përveç kësaj, komunat Kumanovë, Tetovë, Debar, Kërçovë, Kavadarci dhe Negotinë do të sigurojnë ujë teknik me cisternat e tyre për nevojat e banorëve të Gostivarit, në pika të përcaktuara paraprakisht.
Në përputhje me vendimin e Qeverisë, Shërbimi për Çështje të Përgjithshme dhe të Përbashkëta do të vazhdojë me shpërndarjen e ujit të pijshëm për qytetarët e Komunës së Gostivarit.
Nga Qendra për Menaxhim me Kriza u bëhet apel banorëve të Gostivarit që t’i respektojnë në mënyrë të rreptë rekomandimet e institucioneve kompetente dhe të ndjekin rregullisht informacionet zyrtare për zhvillimin e mëtejshëm të situatës.
