Shkup, 19 gusht, Zhurnal.mk – Zëvendëskryeministri i Qeverisë dhe ministër i Transportit Aleksandar Nikoloski realizoi një takim pune me ministrin kosovar të infrastrukturës dhe transportit Dimal Basha.
Në takim morën pjesë edhe zëvendësministrja e transportit Kaltrina Zekoli Shaqiri, si dhe drejtori i NP për rrugët shtetërore Koce Trajanovski.
Temat kryesore të bisedës ishin përmirësimi i bashkëpunimit bilateral, shkëmbimi ekonomik dhe tregtar, zhvillimi rajonal dhe realizimi i projekteve të përbashkëta infrastrukturore.
Dy ministrat u pajtuan se marrëdhëniet mes Maqedonisë dhe Kosovës janë të mira dhe konstruktive, duke theksuar rëndësinë e thellimit të tyre përmes projekteve konkrete.
Në fokus të takimit ishte projekti për ndërtimin e rrugës Tetovë–Prizren, për të cilin grupi i punës nga të dyja vendet vazhdon me finalizimin e dizajnit, pas së cilës do të pasojë nënshkrimi i marrëveshjeve ndërqeveritare për zbatimin.
Zëvendëskryeministri Nikoloski theksoi se Maqedonia ka filluar ndërtimin e segmentit të autostradës Shkup–Bllacë, e cila është me rëndësi kyçe për transport më të shpejtë dhe më të sigurt dhe për lidhje më të madhe ekonomike.
Në takim u hapën edhe çështjet për rivendosjen e transportit hekurudhor, si dhe për futjen e “one stop shop”, pra stacionit hekurudhor të përbashkët kufitar.
Bashkëbiseduesit përfunduan se lidhja më e mirë e transportit krijon mundësi të reja për rritje ekonomike dhe investime në të gjithë rajonin.
