Shkup, 30 shtator, Zhurnal.mk – Më 30 shtator 2026, me ftesë të ministrit të Drejtësisë, u rihap procesi për ndryshimet në Kodin Zgjedhor, me synim zhbllokimin e tij dhe arritjen e një marrëveshjeje politike mes partive parlamentare.
Koordinatori i grupit parlamentar të Levicës, Borislav Krmov, theksoi se mungesa e LSDM-së në takimin konsultativ tregon papjekuri politike dhe qasje jodemokratike, sidomos kur bëhet fjalë për çështje që prekin drejtpërdrejt procesin zgjedhor.
“Për fat të keq shohim se LSDM nuk është e pranishme. Kjo tregon një lloj papjekurie politike dhe jodemokratike. Duket e qartë qëllimi i tyre të lënë Levicën si e vetmja parti e hendikepuar, që nuk mund të marrë mjete nga reklamat politike të paguara”, tha Krmov.
Ai shtoi se Levica mbetet në dy kërkesat kryesore: një njësi zgjedhore dhe shpërndarje të drejtë të mjeteve për fushatat zgjedhore. Sipas tij, trajtimi i drejtë nënkupton edhe mundësinë që reklamat politike të paguara të hiqen krejtësisht.
“Nuk kemi ardhur për para, por për trajtim të drejtë. Nuk ka problem edhe me heqjen e tyre kështu do të kursehen miliona euro për qytetarët, ndërsa Levica më në fund do të ketë kushte të barabarta”, shtoi Krmov.
Ai paralajmëroi se nuk është e lejueshme që një parti të vihet në pozitë të pabarabartë në procesin zgjedhor, ndërsa të gjitha të tjerat të përdorin mekanizmat ekzistues për financimin e fushatave.
Levica mbetet e hapur për bisedime mbi Kodin Zgjedhor dhe pret konsultimet e ardhshme me Ministrinë e Drejtësisë, por do të vazhdojë të insistojë në një njësi zgjedhore, kushte të drejta zgjedhore dhe trajtim të barabartë për të gjitha subjektet politike.
