Tetovë, 18 tetor Zhurnal.mk – Në zgjedhjet e jashtëzakonshme lokale për kryetar të Komunës së Bërvenicës, pas përpunimit të 100 për qind të vendvotimeve, tashmë janë të qartë dy kandidatët që do të vazhdojnë garën në raundin e dytë.
Sipas rezultateve preliminare të Komisionit Shtetëror të Zgjedhjeve, kandidati i VMRO-DPMNE-së, Stojanco Radiçevski, ka fituar 2.943 vota, apo 38,90 për qind, duke u renditur i pari.
Në vendin e dytë është renditur Arkin Jahiji nga Aleanca Kombëtare për Integrim (AKI), me 2.152 vota, apo 28,45 për qind. Kështu, Radiçevski dhe Jahu do të përballen në raundin e dytë për të marrë drejtimin e Komunës së Bërvenicës.
Kandidati i VLEN-it, Jakup Huseini, ka përfunduar garën në raundin e parë në vendin e tretë, me gjithsej 1.528 vota, apo 20,20 për qind.
Ndërkaq, kandidati i LSDM-së, Jovica Radeski, ka siguruar 706 vota.
Me të gjitha 24 vendvotimet e përpunuara, gara për kryetar të Bërvenicës hyn në fazën e dytë, ku qytetarët do të vendosin mes kandidatit të VMRO-DPMNE-së dhe atij të AKI-së.
Rezultatet e publikuara janë preliminare dhe pritet konfirmimi zyrtar nga Komisioni Shtetëror i Zgjedhjeve.
