Studentët falënderojnë ministrin Shasivari për Provimin e jurisprudencës në gjuhën shqipe (VIDEO)

Shkup, 21 tetor, Zhurnal.mk – Studentët e kanë vlerësuar si hap përpara propozimin e ministrit të Drejtësisë, Jeton Shasivari, për mbajtjen e Provimit të jurisprudencës në gjuhën shqipe, duke e cilësuar iniciativën si një avancim në përdorimin e gjuhës shqipe.

Në një prononcim për TV Koha, njëri nga studentët u shpreh se iniciativa e ministrit Shasivari meriton të përshëndetet, ndërsa e falënderoi atë për gatishmërinë për bashkëpunim në këtë çështje.

“Vlerësojmë se iniciativa dhe propozimi i ministrit, megjithatë, janë një avancim në përdorimin e gjuhës dhe në dhënien e Provimit të jurisprudencës në gjuhën shqipe. Kjo është për t’u përshëndetur dhe jemi falënderues që ministri është treguar bashkëpunues në këtë çështje”, u shpreh studenti.

Se propozimi paraqet përparim dhe se po ecet drejt një zgjidhjeje të pranueshme e kanë vlerësuar edhe studentë të tjerë të cilët sipas raportimit, nuk kanë pranuar të prononcohen para kamerave.

Ndryshe, një ditë më parë, ministri i Drejtësisë, Jeton Shasivari, priti në takim përfaqësuesit e studentëve dhe dekanët e fakulteteve juridike, me të cilët diskutoi mundësinë e mbajtjes së Provimit të jurisprudencës në gjuhën shqipe.

Propozimi synon të avancojë përdorimin e gjuhës shqipe në këtë proces, ndërsa diskutimet me studentët dhe përfaqësuesit akademikë pritet të jenë pjesë e përpjekjeve për gjetjen e një zgjidhjeje për këtë çështje.