Shkup, 23 tetor, Zhurnal.mk – Rindërtimi i konviktit studentor “Steve Naumov” nuk zgjati as një muaj, akuzojnë nga Rinia Socialdemokrate e Maqedonisë (SDMM). Nënkryetari i organizatës, Bojan Cvetanoski, përmes një video-adresimi, vuri në dukje kushtet katastrofike në konvikt pas shpenzimit të 10 milionë eurove.
Sipas SDMM-së, studentët po përballen me lagështi, ujë që rrjedh nga të gjitha anët, mungesë të ngrohjes dhe ujit të ngrohtë.
“A nuk duhej që ‘Steve’ të ishte një hotel i kategorisë A? A duket kështu një hotel i kategorisë A, me dhoma që pikojnë dhe me lagështi nëpër mure? U shpenzuan 10 milionë euro, por në vend të kushteve më të mira, studentët nuk kanë as kushtet bazë për jetesë! Për çfarë u shpenzuan milionat? Ku përfunduan paratë? Përsëri në tenderë të dyshimtë partiakë? Është e qartë se më e rëndësishme është të sigurohen automjete me leasing, sesa të garantohen kushte dinjitoze për studentët”, thekson Cvetanoski.
Nga rinia e LSDM-së bëjnë të ditur se participimi për akomodim është rritur dyfish dhe pyesin pse studentët paguajnë 6.600 denarë në muaj për “dhoma që pikojnë dhe kushte mizore”.
SDMM-ja kërkon përgjegjësi të menjëhershme, verifikim dhe publikim të plotë të të gjitha shpenzimeve dhe kontratave që lidhen me projektin.
“Në ditën e VMRO-së, kjo është një porosi nga të rinjtë për hajdutët në pushtet: do të mbani përgjegjësi! Për çdo denar të shpenzuar duhet të ketë llogaridhënie”, porosisin nga SDMM-ja.
