Tiranë, 12 nëntor, Zhurnal.mk – Agjencia e Administrimit të Pasurive të Sekuestruara dhe të Konfiskuara (AAPSK) vijon të zgjerojë bashkëpunimin ndërkombëtar dhe rajonal, me fokus forcimin e kapaciteteve institucionale, shkëmbimin e eksperiencave dhe promovimin e praktikave më të mira evropiane për administrimin dhe ripërdorimin social të pasurive të konfiskuara.
Në këtë kuadër, AAPSK mori pjesë në Takimin e Komitetit Drejtues të projektit rajonal EU4FAST – “Mbështetja e BE-së për Forcimin e Luftës kundër Kontrabandimit të Migrantëve dhe Trafikimit të Qenieve Njerëzore në Ballkanin Perëndimor”, të organizuar më 12 nëntor në Tiranë, me pjesëmarrjen e përfaqësuesve të institucioneve shqiptare, partnerëve ndërkombëtarë dhe organizatave zbatuese të projektit.
Gjatë takimit u trajtua progresi i bashkëpunimit ndërinstitucional, rezultatet e arritura me mbështetjen e EU4FAST, si dhe mundësitë për zhvillimin e mëtejshëm të iniciativave të përbashkëta në luftën kundër krimit të organizuar.
Në fjalën e saj, Kryeadministratorja e AAPSK-së, Risena Xhaja, vlerësoi mbështetjen e partnerëve ndërkombëtarë, duke theksuar rëndësinë që ka bashkëpunimi rajonal jo vetëm në goditjen e veprimtarisë kriminale, por edhe në administrimin e pasurive që burojnë prej saj.
“EU4FAST përfaqëson një iniciativë të rëndësishme në forcimin e kapaciteteve institucionale dhe bashkëpunimit rajonal në luftën kundër kontrabandimit të migrantëve dhe trafikimit të qenieve njerëzore. Në këtë kuadër, një rëndësi të veçantë merr edhe dimensioni ekonomik i luftës kundër krimit, nga gjurmimi dhe sekuestrimi i aseteve kriminale deri te konfiskimi, administrimi dhe ripërdorimi i tyre social”, u shpreh Xhaja.
Një nga rezultatet konkrete të bashkëpunimit ndërkombëtar të AAPSK-së është nënshkrimi i Memorandumit të Mirëkuptimit me institucionin homolog të Bosnjë-Hercegovinës, FAZUOI, iniciativë e mbështetur edhe nga projekti EU4FAST.
Një tjetër moment i rëndësishëm i këtij partneriteti ishte konferenca ndërkombëtare “From Confiscation to Public Good” (Nga konfiskimi në të mirën publike), e zhvilluar në Tiranë më 26 maj 2026, me mbështetjen edhe të EU4FAST.
Një dimension i rëndësishëm i angazhimit të AAPSK-së mbetet promovimi i ripërdorimit social të pasurive të konfiskuara, si një instrument që i jep luftës kundër krimit një ndikim të drejtpërdrejtë në shoqëri.
Në këtë drejtim, bashkëpunimi ndërkombëtar ndihmon në identifikimin e modeleve të qëndrueshme që mundësojnë përdorimin e këtyre pasurive për mbështetjen e kategorive në nevojë, viktimave të trafikimit dhe komuniteteve.
“Ky mesazh merr një rëndësi të veçantë edhe në kontekstin e luftës kundër trafikimit të qenieve njerëzore, ku ripërdorimi social i pasurive të konfiskuara mund të kontribuojë në mbështetjen e viktimave, grupeve vulnerabël dhe komuniteteve”, theksoi Kryeadministratorja e AAPSK-së.
Sipas saj, partneritetet ndërkombëtare krijojnë mundësi për të përmirësuar mënyrën e administrimit të pasurive dhe për të rritur ndikimin e tyre ekonomik e social.
Gjatë fjalës së saj, Xhaja shprehu mirënjohjen për Bashkimin Evropian, Qeverinë Federale Gjermane, Ministrinë e Brendshme të Italisë, Ministrinë e Punëve të Jashtme të Mbretërisë së Holandës, GIZ dhe partnerët e tjerë zbatues të projektit EU4FAST.
Ajo vlerësoi se mbështetja ndërkombëtare ka krijuar mundësi konkrete për zgjerimin e bashkëpunimit rajonal dhe forcimin e marrëdhënieve me institucionet homologe.
