Të paktën 14 persona kanë humbur jetën dhe 30 të tjerë janë plagosur si pasojë e një aksidenti të rëndë rrugor në Emiratet e Bashkuara Arabe, ku janë përfshirë 18 automjete dhe pesë kamionë.
Aksidenti ka ndodhur të enjten (12 nëntor), në emiratin Fujairah, dhe konsiderohet një nga aksidentet rrugore më vdekjeprurëse në historinë e vendit.
Sipas Policisë së Fujairah, aksidenti ndodhi pasi drejtuesi i një kamioni humbi kontrollin e automjetit pak para mesnatës, në rrugën Sheikh Khalifa bin Zayed, pranë hyrjes së emiratit.
Kamioni u përplas fillimisht me një automjet tjetër, më pas u përmbys dhe goditi disa automjete që kishin ndaluar për shkak të trafikut të rënduar. Përplasja shkaktoi zjarr në kamion, i cili u përhap më pas edhe në disa makina dhe automjete të tjera.
Menjëherë pas ngjarjes, ekipet e emergjencës, forcat e mbrojtjes civile, ambulancat dhe policia mbërritën në vendngjarje, ku ndërhynë për shuarjen e zjarrit dhe transportimin e të plagosurve në spitale.
Sipas Policisë së Fujairah, 15 nga personat e plagosur janë larguar nga spitali, ndërsa 15 të tjerë vijojnë të marrin trajtim mjekësor. Mes viktimave ka edhe shtetas të Emirateve të Bashkuara Arabe, ndërsa për identifikimin e disa prej personave të tjerë që humbën jetën autoritetet po përdorin testet e ADN-së.
Në një deklaratë, Ministria e Brendshme e Emirateve të Bashkuara Arabe bëri të ditur se ekipet e emergjencës dhe grupet e specializuara kanë mbërritur në vendngjarje për të hetuar shkaqet dhe rrethanat e aksidentit tragjik.
Ministria u ka bërë gjithashtu thirrje qytetarëve që të informohen përmes burimeve zyrtare dhe të shmangin përhapjen e thashethemeve apo informacioneve të paverifikuara, duke kërkuar respekt për familjet e viktimave dhe për procesin e identifikimit dhe hetimit që po zhvillohet.
