Shkup, 30 mars, Zhurnal.mk – Po bëhen gati dy vite që ndodhën ndryshime në skenën politike në Maqedoninë e Veriut, e pas 22 vitesh në pushtet BDI-ja së fundi duket se po pajtohet se duhet vepruar si parti në opozitë e jo e përmbyllur në shpresën se kundërshtari i saj kryesor politik, VLEN, nuk do të mund të qëndrojë në koalicion qeveritar për t’ia lëshuar ulëset në qeveri.
Ardhja e VMRO-DPMNE-së në pushtet dhe largimi i LSDM-së, ishte evident shumë muaj para se të mbahen zgjedhjet e majit 2024, përderisa ndryshimi në kampin shqiptar ishte një e panjohur deri në moment të fundit.
VMRO-DPMNE që para zgjedhjeve kishte shpallur se do të bashkëpunojë me VLEN-in, por skepticizmi në opinion vazhdoi edhe pas zgjedhjeve, për shkak se koalicioni i udhëhequr asokohe nga BDI me emërtimin “Fronti Evropian” mori numër më të madh të deputetëve.
Veprimi i BDI-së deri tani ka qenë i fokusuar kundër VLEN-it, duke e cilësuar atë sipërfaqësues “jolegjitim” të shqiptarëve në Maqedoni të Veriut. BDI-ja edhe pa zgjedhjeve vazhdoi që të thërret me formulën e saj të dikurshme “fituesi me fituesin”.
Këtë etiketë “jogjitimiteti”, herë BDI, e herë AKI, vazhduan t’ia mveshin koalicionit shqiptar në pushtet edhe pas zgjedhjeve lokale por pakêz më butësisht, sado që koalicioni VLEN e fitoi bindshëm numrin më të madh të komunave në zgjedhjet komunale të vitit të kaluar.
Por me rezultatet e zgjedhjeve lokale dhe me kalimin e muajëve, BDI si duket u pajtua për ndryshimin pasi që e mori një porosi të madhe nga votuesit shqiptarë për ndryshimet në përkrahje të partive politike, përkatësisht një fillimi të zhvendosjes së përkrahjes nga ana e qytetarëve shqiptarë.
E së fundi vërehet një ndryshim i (pa)pritur i qasjes së BDI-së, e cila deri para pak kohe sikurse dëshironte që të shmangte sa më gjatë veprimin e theksuar opozitar, duke preferuar që një pjesë e opinionit shqiptar ende ta perceptonte atë si parti e cila “veç sa nuk është kthyer në pushtet”.
Shkak për këtë kthesë të shpejtë të BDI-së mund të jetë po aq edhe anketa e fundit e cila thotë se partia e Ali Ahmetit ka filluar që të ngecë pas VLEN-it, dhe se asaj i duhet ndërmarrë veprime serioze para publikut për të penguar që dallimi në përkrahje nga qytetarët shqiptarë të mos thellohet edhe më shumë.
Nga ky vështrim, duket se BDI-ja u bind se me konferenca për shtyp që mbanin figura pothuajse anonime të partisë, e të papërgatitura sa duhet në planin përmbajtësor e vizual, është vështirë të veprohet në opozitë.
Kthesën si duket tani po mundohet ta bëjë edhe zëdhënësi dhe veterani i partisë Bujar Osmani, përmes të cilit BDI shënjestrën e drejton kritikat kah VMRO-DPMNE dhe Kryeministri Hristijan Mickoski, gjë që deri tani nuk ka qenë aq e theksuar.
Krejt këto elemente krijojnë përshtypjen se BDI më nuk ngurron, e madje edhe u detyrua, që të pranojë se është parti opozitare, që do të thotë se edhe nëse ka qenë e vërtetë se deri tani ka pritur “pas derës së qeverisë” me shpresën mos ndoshta po del apo dëbohet VLEN-i, tani e tutje nuk do të bëjë një gjë të tillë.
Periudha që vjen do ta vërtetojë ose do të demantojë nëse BDI do t’i shndërrojë veprimet e saja politike si parti në opozitë, pas plot 22 vitesh qeverisje.
E para do ta bënte skenën politike midis partive shqiptare dhe garimin edhe më dinamik, por edhe në krejt Maqedoninë e Veriut.
