Gostivar, 23 tetor Zhurnal.mk – Sot (23.10.2026), në orën 12:05, në autostradën Gostivar – Tetovë, nëpunës policorë nga Njësia Mobile për Sigurinë e Trafikut Rrugor pranë Sektorit për Çështje të Trafikut, me një automjet të posaçëm policor – gjurmues, regjistruan një automjet udhëtarësh të markës “Rolls-Royce”, me targa të Tetovës, i cili lëvizte me shpejtësi prej 194 kilometrash në orë, në një segment rrugor ku shpejtësia maksimale e lejuar është 80 kilometra në orë.
Shoferi B.M. (44) nga Gostivari është privuar nga liria për shkak të dyshimit se ka kryer veprën penale “drejtim i pakujdesshëm i automjetit”, të parashikuar në nenin 297-a të Kodit Penal. Janë ndërmarrë masat dhe aktivitetet përkatëse, ndërsa ndaj tij do të iniciohet procedurë përkatëse në përputhje me ligjin.
Ministria e Punëve të Brendshme vazhdon kontrollet e shtuara të trafikut në të gjithë territorin e shtetit, përfshirë edhe përdorimin e automjeteve të posaçme policore – gjurmuesve, me qëllim zbulimin dhe sanksionimin në kohë të shoferëve të papërgjegjshëm, përmirësimin e sigurisë rrugore dhe mbrojtjen e jetës dhe shëndetit të të gjithë pjesëmarrësve në trafik.
Mosrespektimi i kufizimeve të shpejtësisë përbën një nga faktorët kryesorë për shkaktimin e aksidenteve të trafikut, të cilat jo rrallëherë kanë pasoja të rënda për jetën dhe shëndetin e njerëzve, si dhe për pronën.
Ministria e Punëve të Brendshme u bën apel të gjithë pjesëmarrësve në trafik që t’i respektojnë në mënyrë të vazhdueshme rregullat dhe dispozitat e trafikut dhe, me sjellje të përgjegjshme, të kontribuojnë për siguri më të madhe në rrugë.
