Shkup, 16 shtator, Zhurnal.mk – Kryetari i komunës dhe përfaqësues i pushtetit lokal, Orce Gjorgjievski, sot u drejtua në Forumin Biznesor Maqedono‑Austriak të dedikuar për infrastrukturën rrugore dhe energjetike, me ftesë të kryetarit të Odës Ekonomike të Maqedonisë, Branko Azeski. Në ngjarje morën pjesë edhe zëvendëskryeministri dhe ministri i transportit, Aleksandar Nikoloski, si dhe ministrja e energjetikës, Sanja Bozhinovska.
Para biznesmenëve të pranishëm, Gjorgjievski theksoi se po punohet në debllokimin dhe realizimin e projekteve që për dekada kanë qenë në ngecje.
„I zgjidhëm pengesat pronësore‑juridike te nyja ‘Momin Potok’ dhe mundësuam vazhdimin e punimeve, me afat për përfundim deri në Vitin e Ri. Bulevardi ‘Boris Trajkovski’, i premtuar tri dekada, është para përfundimit. Po lirohet trasa te ura ‘Gjeneral Mihajllo Apostolski’, ndërsa e kemi lëvizur edhe projektin për urën në ‘Ljubljanska’“, theksoi ai.
Ai shtoi se është përfunduar faza e parë e bulevardit ‘Maqedonia’, pas së cilës hyn në fazën e dytë që çon drejt ndërtimit të rrugës së parë nëntokësore në Shkup. Duke theksuar rëndësinë e bashkëpunimit me Qeverinë dhe kryeministrin Hristijan Mickoski, Gjorgjievski porositi se zhvillimi i kryeqytetit sjell përfitime për tërë shtetin, duke përmirësuar kushtet për ekonominë dhe jetën e përditshme të qytetarëve.
