Tiranë, 06 tetor, Zhurnal.mk – Trupa gjyqësore e Gjykatës së Apelit të Juridiksionit të Përgjithshëm përkujtoi sot, në njëvjetorin e ndarjes nga jeta, gjyqtarin Astrit Kalaja, i cili u vra gjatë zhvillimit të një seance gjyqësore.
Në një njoftim për shtyp Gjykata e Apelit të Juridiksionit të Përgjithshëm tha se sot shënohet një vit nga vrasja e gjyqtarit Astrit Kalaja, një humbje e dhimbshme për familjen, kolegët dhe drejtësinë shqiptare.
Në fillim të ditës së sotme, trupa gjyqësore e Gjykatës së Apelit të Juridiksionit të Përgjithshëm u mblodh në kujtim të gjyqtarit Astrit Kalaja, duke nderuar kujtimin e kolegut dhe kontributin e tij në drejtësi.
Më pas, në Shkodër, familjes së tij iu shprehën ngushëllimet dhe solidariteti i kolegëve, të cilët ndajnë dhimbjen e kësaj humbjeje, duke e kujtuar Astritin me respekt e mirënjohje.
Astrit Kalaja lindi në Shkodër dhe u diplomua në vitin 1993 në Fakultetin e Drejtësisë. Me një karrierë 32-vjeçare, Kalaja u emërua për herë të parë magjistrat në Shkodër, më 24 nëntor 1993. Në qershor të vitit 2004, deri në janar 2023, Kalaja ishte gjyqtar i Gjykatës së Apelit në qarkun Shkodër, derisa u emërua në Gjykatën e Apelit të Tiranës.
Në vitin 2019, Kalaja u konfirmua në detyrë, duke kaluar procesin e Vetting-ut. Në vitin 2022, gjyqtari u konfirmua në detyrë edhe nga KPA-ja. Kalaja u zgjodh edhe anëtar në Kolegjin Zgjedhor tri herë radhazi.
Kalaja u qëllua me armë zjarri brenda ambienteve të Gjykatës, më 6 tetor 2025, ku për pasojë humbi jetën.
