Tetovë, 18 Mars, Zhurnak.mk – Aleanca për Shqiptarët, krahu i udhëhequr nga Arben Taravari, ka njoftuar se Gjykata Themelore Tetovë ka hedhur poshtë kërkesën e Ziadin Sela për ndryshimin e kryetarit të partisë.
Në reagimin e publikuar, thuhet se gjykata ka pranuar kërkesën e paraqitur nga Taravari për regjistrimin e ndryshimeve statutare në Regjistrin Gjyqësor të partive politike.
“Sipas vendimit të Gjykatës Themelore në Tetovë, është pranuar kërkesa e paraqitur nga Arben Taravari për regjistrimin e ndryshimeve në Statutin e partisë në Regjistrin Gjyqësor të partive politike”, thuhet njoftimin e ASH-Taravari.
Sipas të njëjtit njoftim, vendimi parasheh:
“Shfuqizohet Statuti i miratuar në Kongresin e III-të të Jashtëzakonshëm të datës 24.12.2022; Regjistrohet Statuti i miratuar në Kongresin e II-të të Aleancës për Shqiptarët, i mbajtur më 27.03.2022, në përputhje me vendimin e Kongresit të IV-t të Jashtëzakonshëm të datës 16.02.2024 në Shkup.”
Po ashtu, nga ASH-krahu i Taravarit theksojnë se gjykata ka refuzuar kërkesën e Ziadin Selës
“Njëkohësisht, gjykata ka refuzuar si të pabazuara kërkesat e paraqitura nga Ziadin Sela lidhur me ndryshimin e kryetarit të partisë dhe ndryshimet statutare.”
