Shkup, 9 shtator, Zhurnal.mk – Trajan Gocevski: Para pavarësimit na kërcënuan se do ta rrafshonin Kuvendin dhe se Shkupit do t’i jepnin një mësim që do ta mbante mend për 100 vjet.
Ministri i parë i Mbrojtjes, Trajan Gocevski, në emisionin “Studio e Hapur” në 4TV, me rastin e 35-vjetorit të pavarësisë së Maqedonisë, theksoi se procesi i pavarësimit nuk kaloi pa kërcënime dhe presione ndaj udhëheqjes së atëhershme shtetërore, raportoi 4news.mk, transmeton Zhurnal.
Ai thotë se nga Beogradi dërgoheshin paralajmërime se, nëse Maqedonia do të vazhdonte drejt shkëputjes pa marrëveshje, udhëheqja maqedonase mund të arrestohej.
Gocevski i përshkruan këto mesazhe si kërcënime të drejtpërdrejta dhe serioze, në një periudhë kur e ardhmja e shtetit ishte e pasigurt.
Sipas tij, pikërisht për shkak të presionit nga Jugosllavia, ndërmerreshin hapa për të parandaluar një ndërhyrje të mundshme ushtarake dhe për të krijuar kushte për mbajtjen e referendumit.
Gocevski, në intervistë, flet edhe për atë që e cilëson si një nga kërcënimet më serioze me të cilat ishte përballur udhëheqja e atëhershme shtetërore.
Sipas dëshmisë së tij, ishte dhënë paralajmërimi se, nëse nuk do të veprohej sipas kërkesave të Beogradit, me Forcat Ajrore do të sulmoheshin Kuvendi dhe rezidencat e presidentit dhe ministrit të Mbrojtjes.
“Do ta rrafshoj Kuvendin me tokë, rezidencën e presidentit, rezidencën e ministrit të Mbrojtjes, ndërsa Shkupit do t’i jap një mësim që të më kujtojë për 100 vjet”, rrëfen Gocevski.
Ai thotë se, pavarësisht kërcënimeve, udhëheqja maqedonase nuk veproi sipas këtyre kërkesave.
Në kushtet kur Maqedonia ende nuk kishte ushtrinë e saj, një nga prioritetet ishte edhe krijimi i bazës ligjore për organizimin e mbrojtjes.
Gocevski tregon se, paralelisht me përgatitjen e Ligjit për Mbrojtjen, po forcohej edhe mbrojtja territoriale, e cila ishte nën komandën maqedonase.
Ai thekson se ishte veçanërisht e rëndësishme që fillimisht të miratohej ligji, pasi pa bazë ligjore, formimi i forcave të veta të armatosura mund të cilësohej si krijim i formacioneve paraushtarake dhe të shërbente si pretekst për ndërhyrje nga Ushtria Popullore Jugosllave (JNA).
Sipas Gocevskit, Ligji për Mbrojtjen u miratua më 14 shkurt, pas së cilës vazhdoi procesi i përgatitjeve për dislokimin dhe forcimin e ushtrisë.
