Mijëra tifozë, futbollistë dhe përfaqësues të klubeve spanjolle u mblodhën të shtunën në stadiumin e Tenerife-s për t’i dhënë lamtumirën e fundit sulmuesit Jesus de Miguel, i cili ndërroi jetë në moshën 30-vjeçare pas një ataku kardiak.
Ceremonia u zhvillua në stadiumin “Estadio Heliodoro Rodriguez Lopez”, ku kapiteni i Tenerife-s, Enric Gallego, nuk arriti t’i mbante lotët gjatë fjalimit të tij në nderim të shokut të skuadrës.
De Miguel pësoi një përplasje me portierin e Andorrës, Jesus Owono, gjatë ndeshjes së së hënës. Pas incidentit, ai u transportua në spital dhe u shtrua në kujdes intensiv. Klubi i Tenerife-s konfirmoi vdekjen e tij të martën në mëngjes.
Në stadium ishte vendosur një banderolë gjigante me fotografinë bardhezi të futbollistit dhe mbishkrimin “Përgjithmonë Demi”, nofka me të cilën e thërrisnin miqtë e tij.
Gjatë ceremonisë u shfaqën pamje nga debutimi i De Miguel me fanellën e Tenerife-s, ndërsa mijëra të pranishmit brohoritën në kor: “De Miguel, të duam”.
Në homazhe morën pjesë futbollistë dhe përfaqësues nga klubet e dy kategorive kryesore të futbollit spanjoll, mes tyre edhe drejtori i Real Madridit, Emilio Butragueño.
Kapiteni Enric Gallego mbajti një fjalim emocionues, gjatë të cilit u shpreh se ishte e padrejtë të flitej për shokun e tij në kohën e shkuar.
“Të flasësh për ty në kohën e shkuar është jashtëzakonisht e padrejtë. Është ende e vështirë të besohet se kjo na ka ndodhur neve, Demi. Ti gjithmonë do të jesh një nga ne”, deklaroi ai mes lotësh.
“Ende po përpiqemi të pajtohemi me faktin se nuk do të jesh më me ne”, shtoi Gallego.
Homazhi 90-minutësh në Santa Cruz de Tenerife u përmbyll me fjalime nga drejtuesit e klubeve dhe një shërbesë fetare.
Në shenjë respekti për futbollistin e ndjerë, të gjitha ndeshjet e futbollit spanjoll gjatë fundjavës nisën me një minutë heshtje.
