Stephen Graham ka folur hapur për një periudhë shumë të vështirë të jetës së tij, duke rrëfyer për herë të rrallë se kishte tentuar t’i jepte fund jetës në të 20-at e hershme, pasi kishte kaluar një periudhë të rëndë depresioni.
Aktori 53-vjeçar ishte larguar nga vendlindja e tij, Kirkby, për të ndjekur shkollën e dramës në Londër.
Në atë periudhë, ai po përballej edhe me disa ngjarje të dhimbshme familjare, mes tyre abortin spontan të nënës dhe vdekjen e gjyshes së tij, shkruan DailyMail.
Në një intervistë të re për The Times, Graham tha se beson se një fuqi më e lartë e kishte shpëtuar. Ai pranoi se në atë kohë ishte një i ri i humbur dhe nuk dinte si t’i përballonte ato që po përjetonte.
Aktori tregoi se pas ngjarjes, familja dhe këshillimi e ndihmuan të përballej me atë periudhë. Sot, ai thotë se mbështetet te meditimi, reiki dhe ushtrimet e përditshme, duke theksuar se tashmë ka ndërtuar themele më të forta dhe një ndjenjë më të qëndrueshme për veten.
Një rol të rëndësishëm në jetën e tij ka pasur edhe bashkëshortja Hannah Walters, me të cilën ishte njohur në shkollën e dramës.
Graham ka treguar më herët se Hannah ishte pranë tij pas asaj periudhe dhe se lidhja e tyre u kthye gradualisht në dashuri. Ata u martuan në vitin 2008 dhe kanë dy fëmijë, Alfie dhe Grace.
