Shkup, 30 tetor, Zhurnal.mk – Mali i Zi është i përkushtuar që procesi i zgjerimit të Bashkimit Evropian të bazohet në meritë. Mali i Zi do të jetë një mbështetës i fortë i Maqedonisë së Veriut në procesin e saj të integrimit evropian, sepse ne besojmë se BE-ja nuk mund të jetë e plotë pa vendet e rajonit, tha zëvendëskryetari për Çështje të Jashtme dhe Evropiane i Malit të Zi, Filip Ivanoviq.
Ivanoviq, i cili ndodhet në një vizitë pune dy-ditore në vend, në një konferencë të përbashkët për shtyp me zëvendëskryeministrin dhe ministrin e Transportit Aleksandar Nikolloski, tha se Mali i Zi është lider në procesin e eurointegrimit midis vendeve në rajon dhe pret që në vitin 2028 të bëhet anëtar i plotë.
“Anëtarësimi nuk do të thotë dalje nga rajoni, por mbështetje për vendet e tjera në rajon dhe anëtarësimin e tyre. Mali i Zi është i përkushtuar që procesi i zgjerimit të bazohet në meritë dhe BE-ja nuk mund të jetë e plotë pa të gjitha vendet e rajonit. Prandaj, shumë shpejt, kur Mali i Zi të bëhet anëtar i plotë i Bashkimit Evropian, kjo do të jetë gjithashtu një mbështetje e fortë për Maqedoninë e Veriut në procesin e saj të integrimit evropian, me dëshirën për t’u gjendur atje së bashku sa më shpejt të jetë e mundur”, tha Ivanoviq.
Dy zëvendëskryeministrat konstatuan se bashkëpunimi politik midis vendeve është i shkëlqyer, pa çështje të hapura, gjë që lë hapësirë për bashkëpunim në të gjitha fushat e tjera. Ata diskutuan gjithashtu për intensifikimin e bashkëpunimit ekonomik dhe ranë dakord të mbajnë një forum biznesi të kompanive nga të dy vendet vitin e ardhshëm.
Sa i përket infrastrukturës rrugore, u diskutua për lidhjen me portin e Tivarit në Mal të Zi, gjë që, sipas zëvendëskryeministrit Nikolloski, do të realizohet përmes ndërtimit tashmë të filluar të autostradës Shkup – Bllacë.
“Duke pasur parasysh që kemi një lidhje të mirë me portin e Selanikut, ndërtojmë lidhje me portin në Durres, me ndërtimin e kësaj autostrade do të kemi edhe një lidhje të shkëlqyer me portin e Tivarit dhe në këtë mënyrë po bëjmë atë që është më e mira për vendin, që është, si një vend pa dalje në det, të kemi qasje në të paktën tre porte”, tha Nikolloski.
Të dy zëvendëskryeministrat u dakorduan që zhvillimet e fundit politike në Serbi nuk duhet të ndikojnë në realizimin e projekteve strategjike.
“Prova më e mirë se ndryshimi i qeverisë nuk ndikon në këto projekte të mëdha është ajo që do të ndodhë në dhjetor. Pavarësisht ndryshimit të qeverisë në Hungari, më 13 dhjetor treni me shpejtësi të lartë do të fillojë të qarkullojë nga Beogradi nëpërmjet Budapestit në Vjenë, kështu që këto janë projekte që janë një përparësi strategjike në rajon dhe pres që qeveria e re në Serbi të vazhdojë të zhvillojë infrastrukturën në atë drejtim sepse Korridori 10 është një lidhje natyrale për ta me Detin Egje dhe nuk besoj se do të heqin dorë prej tij”, tha Nikolloski.
