Izet Mexhiti: Sondazhi konfirmon mbështetjen për VLEN-in dhe nevojën për unifikim

Shkup, 28 mar, Zhurnal.mk – Kryetari i Komunës së Çairit, Izet Mexhiti, përmes një statusi në rrjetet sociale ka komentuar rezultatet e sondazhit të fundit, duke theksuar se ato pasqyrojnë qartë mbështetjen qytetare për VLEN, transmeton zhurnal.mk.

Sipas Mexhitit, sondazhi dëshmon përkrahjen për, siç e quan ai, “qeverisjen me duar të pastra”, duke e lidhur këtë me luftën kundër korrupsionit, investimet kapitale dhe rehabilitimin e komunave.

Ai ka theksuar se qytetarët po vlerësojnë rezultatet konkrete, si rritja e pensioneve, investimet në infrastrukturë, mbështetja për mjekët, gjinekologët dhe stomatologët, si dhe ndërtimi i universiteteve dhe projekteve të tjera zhvillimore.

Mexhiti gjithashtu ka kritikuar opozitën shqiptare, duke e akuzuar për, siç tha, përhapje të “fake-news” dhe përpjekje për të krijuar pasiguri dhe paqartësi te qytetarët.

“Ky sondazh është demanti më i mirë i fushatave kaotike dhe propagandës së rreme opozitare, e cila nuk mund ta mundë shërbimin e ndershëm të VLEN-it”, ka shkruar Mexhiti.

Në fund, Mexhiti ka nënvizuar se mesazhi i qytetarëve është i qartë: nevoja për bashkim dhe konsolidim të VLEN në një subjekt të vetëm politik, me strukturë të fuqishme dhe zë të unifikuar në skenën politike.