Shkup, 4 nëntor, Zhurnal.mk – Strategjia Kombëtare për Sigurinë në Komunikacionin Rrugor 2026-2030 paraqet një dokument të rëndësishëm strategjik që e njeh kontributin e arsimit në krijimin e kulturës së komunikacionit dhe avancimin afatgjatë të sigurisë, theksoi ministrja e Arsimit dhe Shkencës, prof. dr. Vesna Janevska, në promovimin e strategjisë së re.
Ajo potencoi se edukimi luan rol kyç si mekanizëm parandalues për të rinjtë pjesëmarrës në komunikacion.
“Arsimi është një nga mekanizmat më të fuqishëm parandalues. Njohuritë, qëndrimet dhe shprehitë që kontribuojnë në pjesëmarrje të sigurt në komunikacion duhet të zhvillohen që në moshë të hershme, duke filluar nga edukimi parashkollor dhe duke vazhduar në të gjitha nivelet e procesit arsimor. Temat për sigurinë në komunikacion janë të integruara në procesin edukativo-arsimor përmes aktiviteteve mësimore dhe jashtëmësimore, si dhe përmes fushatave në bashkëpunim me Ministrinë e Punëve të Brendshme, organizatat profesionale dhe njësitë e vetëqeverisjes lokale”, theksoi Janevska, duke shtuar se të dhënat për aksidentet në komunikacion tregojnë nevojën për një qasje edhe më të koordinuar.
Ministria e Arsimit dhe Shkencës, në bashkëpunim me Byronë për Zhvillimin e Arsimit, do të punojë në avancimin e mëtejshëm të përmbajtjeve arsimore përmes të cilave nxënësit do të fitojnë njohuri praktike, do t’i identifikojnë rreziqet dhe do të zhvillojnë shprehi për sjellje të përgjegjshme dhe përdorim të pajisjeve mbrojtëse.
Janevska theksoi se një pjesë e aktiviteteve do të fokusohet në forcimin e kompetencave të kuadrit arsimor dhe sigurimin e materialeve përkatëse edukative, pasi edukimi i suksesshëm kërkon mësimdhënës të përgatitur dhe burime moderne.
Njëkohësisht, ajo mbështeti idenë për forcimin e zonave të sigurisë rreth shkollave, parqeve dhe qendrave të lagjeve përmes partneriteteve me komunat dhe sektorin civil.
“Krijimi i një mjedisi më të sigurt rreth vendeve ku qëndrojnë fëmijët është detyrim i përbashkët i të gjitha institucioneve dhe i gjithë komunitetit. Po aq e rëndësishme është që të rinjtë të fitojnë njohuri dhe shkathtësi bazë për veprimin e duhur në minutat e para kritike pas një aksidenti trafiku, në bashkëpunim me Kryqin e Kuq dhe institucionet shëndetësore”, tha ministrja.
Në fund, Janevska i inkurajoi të gjitha palët e përfshira të ndërtojnë një kulturë të qëndrueshme të sigurisë si përgjigje ndaj rreziqeve në komunikacion, duke nënvizuar se suksesi i Strategjisë varet nga veprimi i përbashkët dhe i koordinuar.
