Vetëm pak ditë pasi ka marrë pozitën e Ministres së Industrisë, Ndërmarrësisë, Tregtisë dhe Inovacionit, Mimoza Kusari-Lila, ka shkarkuar nga pozita e ushtruesit të detyrës së kryeshefit të Kosovo Investment and Enterprise Support Agency (KIESA), Zef Dedaj.
Ndonëse zyrtarisht nuk është përë publik ky vendim i ministrës, Fakti Ditor merr vesh nga burime brenda ministrisë se Dedaj është shkarkuar nga Ministrja Kusari Lila në ditën e dytë të mandatit të saj si ministre.
Në pozitë të njëjtë ajo ka rikthyer, Nol Buzhala, i cili deri tash ka mbajtur pozitën e drejtorit të Drejtoratit për Zhvillimin e Sektorit Privat.
Dedaj ishte emëruar ushtrues detyre i kryeshefit të KIESA-s gjatë mandatit të ish-ministres së kësaj ministrie, Rozeta Hajdari ndonëse ishte vetëm udhëheqës Divizioni që sipas ligjeve në fushqi të njejtit nuk i ka takuar ajo pozitë. Por pavarësisht kësaj ai për rreth 5 vjet kishte drejtuar këtë agjenci që merret me promovimin e investimeve dhe mbështetjen e ndërmarrjeve në Kosovë.
Gjatë periudhës sa ishte në krye të KIESA-s, emri i Dedajt është përmendur nga mediat me kritika publike që lidhen kryesisht me mënyrën e funksionimit të agjencisë.
Përfaqësues të bizneseve dhe organizata ekonomike kanë ngritur shqetësime për transparencën e skemave të granteve dhe për kriteret e përzgjedhjes së përfituesve në programet mbështetëse të KIESA-s.
Po ashtu, në media janë publikuar raportime dhe analiza që kanë vënë në diskutim mënyrën e menaxhimit të programeve të mbështetjes për bizneset, duke përmendur edhe mundësinë që disa kompani të kenë përfituar më shumë se një herë nga skemat e subvencioneve.
