Trajnerja e fitnesit me origjinë shqiptare, Senada Greca, e njohur edhe si trajnerja personale e yllit amerikan Kim Kardashian, është prezantuar në revistën prestigjioze “Entrepreneur”, ku ka rrëfyer rrugëtimin e saj nga vështirësitë e fëmijërisë deri te ndërtimi i një biznesi në industrinë e fitnesit dhe mirëqenies.
Greca, e cila ka ndërtuar një komunitet prej më shumë se 10 milionë ndjekësish në platformat digjitale, sot drejton disa biznese në fushën e mirëqenies, përfshirë kompanitë “WeRise” dhe “Aonic”.
Historia e saj, siç tregohet në intervistë, është dëshmi e mënyrës se si sfidat personale mund të shndërrohen në motiv për të ndërtuar një karrierë të suksesshme.
E rritur në Shqipëri gjatë regjimit komunist, Greca ka treguar se familja e saj u përball me vështirësi, përfshirë mungesën e ushqimit.
Në moshën 14-vjeçare u shpërngul në Shtetet e Bashkuara të Amerikës, ku iu desh të përshtatej me një kulturë të re dhe të merrte përgjegjësi të mëdha për moshën që kishte.
Meqë ishte e vetmja në familje që fliste anglisht, ajo u bë një mbështetje e rëndësishme për familjarët.
Sipas rrëfimit të saj, kjo periudhë u shoqërua me çrregullime të të ushqyerit, depresion dhe ankth.
Ushtrimet fizike dhe fitnesi u bënë një mënyrë për të përballuar vështirësitë dhe për të ndryshuar raportin me veten.
Në vend që të synonte të ishte sa më e dobët, Greca filloi të përqendrohej te forca dhe shëndeti.
Ajo thekson se disiplina, më shumë sesa motivimi i përkohshëm, është ajo që e ndihmon një person të vazhdojë edhe në ditët kur nuk ka dëshirë për të ushtruar apo për të punuar.
Me kalimin e kohës, këtë filozofi vendosi ta ndajë edhe me të tjerët.
Edhe pse ka përfunduar studimet për administrim biznesi dhe ka punuar më parë në sektorët e financave dhe shitjeve, Greca nisi të publikonte ushtrime dhe këshilla për fitnesin në rrjetet sociale, fillimisht si një pasion.
Rritja e interesimit nga publiku e shtyu të themelonte “WeRise”, një platformë që synon t’i ndihmojë gratë të ndërtojnë forcë fizike dhe vetëbesim, duke u përballur edhe me traumat, pasiguritë dhe sfidat profesionale.
Aplikacioni ofron programe stërvitjeje, këshilla për ushqyerjen, udhëzime personale nga Greca dhe një komunitet që nxit vazhdimësinë.
Suksesi në rrjetet sociale bëri që puna e saj të binte në sy edhe të Kim Kardashianit, e cila e zgjodhi si trajnere personale.
Sipas Grecës, Kardashian u impresionua nga disiplina, historia dhe puna që ajo kishte ndërtuar ndër vite.
Bashkëpunimi me të i dha trajneres shqiptare një ekspozim edhe më të madh dhe e ndihmoi të krijonte mundësi të reja profesionale.
Greca ka treguar se me Kardashianin përdor të njëjtat metoda stërvitjeje që ofron edhe përmes aplikacionit “WeRise”.
Një tjetër hap në karrierën e saj ishte themelimi i “Aonic”, një kompani suplementesh që synon të ofrojë produkte të bazuara në shkencë dhe të informojë konsumatorët për mirëqenien.
Greca thotë se dëshiron ta bëjë këtë industri më të kuptueshme dhe më të përballueshme, në një treg ku, sipas saj, çmimet e larta shpesh lidhen edhe me shpenzimet e marketingut dhe promovimit.
Përmes një modeli anëtarësimi, “Aonic” synon t’u mundësojë klientëve t’i blejnë produktet me çmim sa më afër kostos.
Ajo përmend edhe inteligjencën artificiale si një mjet që mund të ndihmojë në uljen e shpenzimeve dhe, rrjedhimisht, të çmimeve për konsumatorët.
Në intervistën për “Entrepreneur”, Greca ka theksuar se synimi i saj nuk është që bizneset të varen vetëm nga emri i saj, por të rriten duke ruajtur cilësinë, përballueshmërinë dhe besimin e klientëve.
Shton po ashtu se dëshiron t’i ndihmojë sa më shumë njerëz që të kujdesen për veten, pa e shndërruar mirëqenien në një privilegj që mund ta përballojnë vetëm pak persona.
Rrugëtimi i Senada Grecës, nga një vajzë që u largua nga Shqipëria në moshën 14-vjeçare te një sipërmarrëse që punon me një prej emrave më të njohur të showbiz-it botëror, përbën një histori të ndërtuar mbi disiplinën, përvojat personale dhe shndërrimin e pasionit në biznes.
