Shkup, 4 shtator, Zhurnal.mk – Parandalimi i dhunës mes bashkëmoshatarëve, përmirësimi i cilësisë së mësimit dhe siguria e nxënësve janë ndër prioritetet e Ministrisë së Arsimit dhe Shkencës, theksoi ministrja Vesna Janevska, duke iu përgjigjur pyetjeve të gazetarëve me rastin e vendosjes së gurthemelit për sallën e re sportive në SHFK “Vëllazërimi”.
Janevska tha se Ministria planifikon aktivitete të vazhdueshme për parandalimin e dhunës mes bashkëmoshatarëve dhe krijimin e një sistemi të qëndrueshëm që do të veprojë në mënyrë parandaluese. Ajo kujtoi se Qeveria ka ndërmarrë projekte, ndryshime ligjore dhe rregullime në shkolla për të parandaluar dhe sanksionuar dhunën.
“Ndërmorëm projekte dhe ndryshime ligjore. Ndërmorëm ndryshime në shkolla në lidhje me orarin e mësuesve, kujdesin, madje edhe ndëshkime për ata prindër fëmijët e të cilëve përsërisin dhunë mes bashkëmoshatarëve”, tha Janevska.
Sa i përket transportit ndërqytetës falas për studentët, ministrja sqaroi se një masë e tillë nuk është paraparë për momentin. Studentët, sipas saj, kanë të siguruar transport falas brenda qyteteve.
Ajo rikujtoi se arsimi fillor dhe i mesëm është falas, ndërsa arsimi i lartë paguhet me një pjesëmarrje minimale, duke shtuar se studentët kanë mundësi të regjistrohen në gjashtë universitete shtetërore.
Ndër prioritetet kryesore, Janevska veçoi përmirësimin e cilësisë së arsimit përmes futjes së mësimit me një turn, mësimit të plotë për nxënësit më të vegjël, ndryshimeve në programet e arsimit të lartë dhe miratimit të ligjit të ri për arsimin e lartë.
Ministrja u ndal edhe te vala e të nxehtit, duke theksuar se Shkupi aktualisht nuk është në fazë portokalli dhe se ekzistojnë procedura të përcaktuara për marrjen e masave nëse kushtet e kërkojnë. Ajo apeloi që nxënësit, prindërit dhe mësuesit të mos marrin masa vetë, pasi Ministria do të reagojë në kohë nëse ka nevojë.
Në lidhje me SHFK “Kiro Gligorov”, ku një pjesë e mësimit zhvillohet online për shkak të punimeve ndërtimore, Janevska sqaroi se vendimi është marrë kryesisht për sigurinë e nxënësve.
“Përfitimi që nxënësit në ‘Kiro Gligorov’ do ta kenë tani për 20 vitet e ardhshme është shumë më i madh sesa fakti që fëmijët do të mësojnë dy javë online”, tha Janevska.
Ajo shtoi se çdo ndryshim i organizimit të mësimit në këtë shkollë nuk është vendim i Ministrisë, por duhet të diskutohet mes drejtoreshës dhe kryetarit të komunës, nëse vlerësohet se kushtet janë të sigurta.
