Prishtinë, 01 qershor, Zhurnal.mk – Partitë politike vazhdojnë aktivitetet në kuadër të fushatës zgjedhore për zgjedhjet e parakohshme të 7 qershorit, me tubime dhe takime elektorale në disa qytete të Kosovës.
Lëvizja Vetëvendosje do ta nisë agjendën e saj me tubim zgjedhor në Rahovec, duke filluar nga ora 17:30. Në ora 19:00, LVV-ja do të mbajë tubim në Suharekë, në Shtëpinë e Kulturës, ndërsa aktivitetet e ditës do t’i përmbyllë me tubim në Malishevë, në shkollën “Ismail Qemali” në fshatin Bellanicë, duke filluar nga ora 21:00.
Partia Demokratike e Kosovës do të organizojë tubim me gratë në ora 16:00, në hotelin “Emerald” në Prishtinë. Më pas, në ora 18:00, PDK-ja do të mbajë tubim zgjedhor në Malishevë, në oborrin e shkollës “Ibrahim Mazreku”, ndërsa në ora 19:30 do të zhvillojë tubim në Drenas, në sheshin “Fehmi Lladrovci”.
Lidhja Demokratike e Kosovës do të mbajë tubim zgjedhor në Rahovec në ora 17:00, në Shtëpinë e Kulturës “Mensur Zyberaj”. Në vazhdim, në ora 18:30, LDK-ja do të takojë qytetarët në Prizren, në Sheshin e Lidhjes, ndërsa në ora 20:00 do të mbajë tubim në Dragash, në hotelin “Meka”.
Ndërkaq, Aleanca për Ardhmërinë e Kosovës do të mbajë tubim zgjedhor në Gjilan, në kuadër të aktiviteteve të saj për fushatën zgjedhore.
