Tiranë, 19 tetor, Zhurnal.mk – Policia është përplasur me protestuesit e rinj në qendër të Tiranës pasditen e të hënës, ku dhjetëra persona u shoqëruan nga efektivët. Protestuesit ishin mbledhur pranë Tajvanit, por Policia nisi t’i rrethonte, duke mos i lënë të afroheshin te Kryeministria.
Pas gazit lotsjellës dhe ujit nga autoboti, efektivët u janë afruar të rinjve dhe kanë ndaluar shumë prej tyre, ndërsa të tjerëve u kanë kontrolluar çantat për të parë nëse kishin mjete të ndaluara.
Gjatë ditës ka pasur disa episode të ngjashme, disa herë edhe të dhunshme. Më parë, protestuesit thyen derën e hyrjes së publikut të Gjykata e Apelit.
Policia ka shtuar numrin e furgonave dhe efektivëve të përfshirë në kontrollimin e turmës, duke mos i lejuar të grumbullohen.
Protestat kanë nisur javën e kaluar, fillimisht te Ministria e Arsimit, e më pas janë përhapur në të gjithë qytetin, duke u bërë më të dhunshme në Bulevardin Dëshmorët e Kombit. Dhjetëra të rinj dhe jo vetëm janë arrestuar gjatë këtyre ditëve.
Protestuesit kërkojnë dorëheqjen e Kryeministrit Rama, ndërsa ky i fundit akuzoi të hënën se ata frymëzohen nga ANTIFA dhe nuk kanë lidhje me studentët. (A2 Televizion)
