Shkup, 5 shtator Zhurnal.mk – Skender Rexhepi-Zejd, kryetar i Lëvizjes Populli, ka akuzuar Qeverinë se po shkel të drejtat e shqiptarëve dhe të gjuhës shqipe.
Ai vëren se deklaratat e kryeministrit dhe ministres së Arsimit për rritjen e numrit të lindjeve, si edhe thirrjet drejtuar mërgimtarëve për t’u kthyer në vend, nuk përputhen me realitetin që pasqyrojnë të dhënat demografike.
Sipas Rexhepi-Zejdit, zhvillimet demografike nuk janë të njëjta për të gjitha komunitetet, ndaj statistikat duhet të analizohen për të kuptuar shqetësimet konkrete të vendit.
“Qeveria aktuale e OBRM-PDUKM-së synim parësor e ka shkeljen e të drejtave të shqiptarëve dhe gjuhës shqipe”, është shprehur ai.
Rexhepi-Zejd thekson se në komunat me shumicë shqiptare ka më shumë lindje se vdekje, ndërsa në totalin e 80 komunave të vendit vetëm 17 prej tyre regjistrojnë shtim natyror pozitiv.
Ndër komunat me treguesit më të mirë demografikë, sipas tij, përfshihen pikërisht disa prej komunave ku shumicën e përbëjnë shqiptarët.
Nisur nga këto të dhëna të regjistrimit të popullsisë, ai pyet se për cilën demografi shqetësohet në të vërtetë Qeveria dhe çfarë mesazhi përcjellin këto statistika.
Qëndrimi i Rexhepi-Zejdit është pjesë e kritikave të vazhdueshme që ai ka adresuar ndaj politikave qeveritare për të drejtat dhe përfaqësimin e shqiptarëve.
