Madrid, 16 tetor, Zhurnal.mk – Spanja dhe Italia pritet t’i japin fund së shpejti kontrolleve kufitare të vendosura në gusht, pas një mosmarrëveshjeje diplomatike lidhur me krizën e emigracionit në enklavën spanjolle të Ceutës.
Sipas burimeve diplomatike, kryeministri spanjoll Pedro Sanchez dhe kryeministrja italiane Giorgia Meloni ranë dakord për pezullimin e këtyre masave në kuadër të një samiti të Bashkimit Evropian, të zhvilluar të enjten dhe të premten në Bruksel.
Në fillim të gushtit, Italia kërkoi përjashtimin e Spanjës nga zona Shengen, hapësira evropiane e lëvizjes së lirë. Qeveria italiane, duke shprehur shqetësimin për pamjet e mbërritjes së emigrantëve në Ceuta, njoftoi vendosjen e kontrolleve kufitare për udhëtarët që vinin nga Spanja.
Madridi e kundërshtoi ashpër vendimin e Romës, duke e akuzuar atë se po i nënshtrohej demagogjisë, dhe vendosi në përgjigje kontrolle në kufirin me Italinë.
Sipas marrëveshjes së arritur në Bruksel, Italia vendosi t’i zgjasë edhe me një javë kontrollet ndaj udhëtarëve nga Spanja, në mënyrë që ato të përfundojnë në të njëjtën kohë me masat e vendosura nga autoritetet spanjolle, bëjnë të ditur burime qeveritare italiane.
Liderët e 27 vendeve anëtare të BE-së pritej të diskutonin gjithashtu çështjet e emigracionit në nivel evropian gjatë një dreke të premten.
