Sulmuesi i Interit, Marcus Thuram, i ka bërë homazh legjendës së NBA-së, Kobe Bryant, përmes një postimi në Instagram gjatë festimeve për titullin e 21-të kampion të Serie A-së nga “Nerazzurrët”.
Thuram ka rikrijuar një nga fotografitë ikonike të Bryant, duke pozuar në dhomën e zhveshjes me dy trofe të “Scudetto”-s, teksa Interi po festonte suksesin e madh të sezonit.
Sulmuesi francez kishte shënuar golin e parë në fitoren 2-0 ndaj Parma Calcio 1913, rezultat që i siguroi Interit titullin kampion tre ndeshje para përfundimit të kampionatit.
Menjëherë pas ndeshjes, ai publikoi imazhin në rrjete sociale, duke imituar një fotografi të famshme të Bryant të realizuar në qershor të vitit 2001, pas fitores së Los Angeles Lakers ndaj Philadelphia 76ers në finalen e NBA-së.
Postimi u interpretua si një dedikim simbolik për legjendën amerikane dhe për suksesin historik të Interit këtë sezon.
